Саха дьонугар бү күннэргэ курус күн үүннэ

37

Бар дьон, саха норуотун бүттүүнүн дириҥ ытыктабылын, тапталын, сүгүрүйүүтүн ылбыт бастакы президеммит Михаил Ефимович Николаевы кытта бырастыылаһа элбэх киһи кэлэр. Сарсыардаттан саҕалаан эдэриттэн кырдьаҕаһыгар тиийэ мусталлар. Саха дьонугар бү күннэргэ курус күн үүннэ: тутаах, тумус туттар, холобур оҥостор, тыыннаах сылдьан номох буолбут улуу киһибитин тиһэх суолугар атаарабыт.

 

"Кини норуот дириҥ ытыктабылынан уонна убаастабылынан дьиҥ чахчы туһаммыт киһи, кинилэр тапталларын, убаастабылларын ылыаҕын ылбыт киһи. Ол иһин биһиги бүгүн кутурҕаммыт сүрдээх улахан, туохха даҕаны тэҥнэспэт. Саха дьонугар, Саха сирин туһугар олоҕун бүүс-бүтүннүү анаабыт киһи", - диир  Дьокуускай олохтооҕо Климент Корякин.

 

Михаил Николаев уларыта тутуу дьалхааннаах кэмигэр саха норуотун дьылҕатын бэйэтин тус эппиэтинэһигэр ылбыт, муударай, инникини өтө көрөр дириҥ быһаарыылары, саҕалааһыннары олоххо киллэрбит, олохпут-дьаһахпыт бары араҥатыгар сайдыы акылаатын уурбут, киэҥ аартыгар туруорбут киһинэн буолар. Ол курдук, Михаил Ефимович норуот быһыытынан сайдар кэскилбит төрөөбүт ийэ тылбытыгар сытарын өйдөөн, бу хайысхаҕа уһулуччу кылаатын киллэрбитэ.

 

"Михаил Ефимович сырдык кэриэһин толорон, биһиги тылбыт чэчирии сайдарыгар, бука бары биир киһи курдук санаанан үлэлиэхпит. Тылбытын сүтэрбэт туһугар норуот быһыытынан сомоҕо, күүстээх, эрэллээх буоларбытыгар Михаил Ефимович эппит тыллара, кини сирдээбит ыраас суола сырдык сулус буолан сыдьаайа туруоҕа", - диэн СӨ Ил Дарханын уонна бырабыытылыстыбатын тыллар сайдыыларыгар салалтатын салайааччы Римма Жиркова этэр.

 

Бастакы президеммит төрөөбүт тылбыт, культурабыт, доруобуйа харыстабыла, үөрэҕирии, наука эйгэлэригэр эмиэ тугунан да тэҥнэммэт кэскиллээх сокуоннары ылынан, хас биидии Саха сирин олохтооҕо дьоһун, сайдыылаах олохтоох буоларыгар турууласпыта. Бүтүн дойду үрдүнэн ыһыллыы кэмигэр кини сөптөөхтүк дьаһанан нэһилиэнньэни өйөөн, күүс-көмө, дурда-хахха буолбута.

 

"Михаил Ефимовичка махтанарым диэн, кини 90 сылларга президент буолан олорон биэнсийэлээхтэргэ көмөлөспүтэ. Биэнсийэ, стипендия төлөөбөттөр этэ, хамнаспыт куруутун хойуутуура, онон аччыктыыр этибит диэххэ. Аһаҕастык эттэххэ. Ону кини биэнсийэбитин төлөөн, биһиги олус үчүгэйдик ыарахан кэмтэн таҕыстахпыт дии", - диэн Хаҥалас улууһун олохтооҕо Декабрина Попова кэпсиир.

 

Михаил Ефимович Николаев ийэ, аҕа, оҕо - хас биирдии дьиэ кэргэн бигэ туруктаах буоллаҕына эрэ уопсасатыба, норуот тирэхтээх, сайдар кэскиллээх буоларын билэн кыһаллара, үлэлиирэ-хамсыыра. Кини оҕо спортка кыратыттан сыстарыгар олук ууран, бүтүн аан дойду таһымыгар биһирэммитэ. Хаҥалас улууһун көҥүл тустууга тутаах тренерэ Анатолий Петров:

 

"Михаил Ефимович курдук үлэлээбит киһи, мин санаабар, биһиги кэммитигэр суох. Спорт өттүгэр этиэхпин баҕарабын, Азия оҕолоро диэн Аан дойду күрэхтэһиитин тэрийэн, кини бу эдэркээн оҕолору спортка сыһыартаан спорт эйгэтин билиһиннэрэн, улахан дьыала оҥорди дии саныыбын".

 

Улуу киһибит олох-дьаһах ханнык баҕар араҥатыгар ис сүрэҕинэн ыалдьара, кини аан дойду үрдүнэн бэйэбит сайдар суоллаах-иистээх норуоппут диэн өйү-санааны иҥэрбитэ.  

 

"Саамай суолбутун-ииспитин тыырынар кэммитигэр, Михаил Ефимович бэйэтин кытаанах быһаарыныытынан, муударай политикатынан уонна сүрүнэ диэн, киниэхэ дьон итэҕэйэн, бэйэтин тула норуоту түмэн, уустук күммүтүгэр Өрөспүүбүлүкэни инники күөҥҥэ таһаарбыт, түмпүт, сомоҕолообут киһинэн буолар", - диэн Ил Түмэн тыа сиригэр уонна аграрнай политикаҕа сис кэмитиэтин бэрэссэдээтэлэ Андрей Находкин иһитиннэрдэ.

 

Бастакы президеммит Михаил Ефимович Николаев сырдык аата үйэлэр тухары умнуллуо суоҕа, оттон кини саха норуотун сайдыытыгар оҥорбут үтүө, дьоһун кылаата өссө дириҥээн иһиэҕэ.