Хара нэһилиэгэр 6 араас сыыры оҥорор сыах үлэлиир

Тыа сирин сүрүн дьарыга ынах-сүөһү иитиитэ. Манна үрүҥ илгэни үрүлэтэн араас аһы-үөлү оҥороллор. Хара нэһилиэгэр бу соторутааҕыта сыыры оҥорор сыах арыллан, үлэлээн саҕалаабыта. Манна күннэтэ биир дьиэ кэргэн хаһаайыстыбалартан үүт тутан, сыыры оҥорон нэһилиэнньэҕэ хамаҕатык батарар. Алена Филиппова бу курдук мэһийэн хас күн ахсын 200 лиитэрэ ынах үүтүттэн 6 араас сыыры оҥорор.

"Бастаан мэһийэммин кыра сыыр туораахтарын оҥорон таһаарабын. Бу туораахтарбын сылытан сыыр тиэстэтин оҥоробут. Төһөнөн элбэх араҥалаах да, үчүгэй буолар. Ол иһин сылыта-сылыта ууннары тардабыт ", - диэн Сыыры оҥорор сыах маастара Алёна Филиппова иһитиннэрдэ.

Сыыры оҥоруу сүрүн ирдэбилэ, тохтобула суох сылаас ууга мэһийии буолар. Хас да чаас тохтобула суох үлэ кэнниттэн сыырдара бэлэм буолан, анал фуормаларга угаллаллар. Уонна салгыы ситэрин күүтэ холодильникка угаллар.

Хас биирдии сыыр бэлэм буолар болдьоҕо араастаһар. Манна сүрүннээн сымнаҕас сыыры оҥороллор, онон түргэнник ситэр. Филипповтар Липецк куоракка баран, дьиэ кэргэнинэн үөрэммиттэр. Инникитин сайдан, сыыр арааһын элбэтэн, өссө да атын ньыманы туһанан үлэлиир санаалаахтар.

"Биһиги үксүн сымнаҕас сыырдары оҥоробут. Кинилэри харайыы, кытаанах сыырдааҕар кылгас. Саҥа саҕалаабыт буоламмыт, сымнаҕас сыырдартан саҕалаатыбыт. Онтон кытаанахха үөрэнэн иһиэхпит буоллаҕа дии", - диир Алёна Филиппова.

Саха сиригэр сыыры оҥоруу кыра-кыралаан сайдан, хас улуус ахсын бу курдук кыра  сыахтар арылланнар олохтоох нэһилиэнньэни бэйэ аһынан хааччыйаллар. Филипповтар сыахтарын арыйан үлэлэппиттэрэ ыйтан эрэ орто. Өссө салгыы атын нэһилиэктиэргэ бородууксуйаларын тарҕатан, өрөспүүбүүкэ ырыынагар тиийэ бэйэ оҥорбут сыырдарын батарар былааннаахтар.

"Ол иннинэ Омскайдан Максим Антипин диэн олус үчүгэй технолог кэлэн икки нэдиэлэ үлэлээбитэ. Мин кинини кытта көрсөн кэпсэппитим, ону кини Саха сирин ынахтарын үүтэ биһиги үүппүтүттэн олох ураты эбит диэн этэр. Сыата-арыыта элбэх, амтана олус минньигэс, ханнык да кыраасканы укпакка эрэ, сыырдарын бэйэтин дьүһүнэ сап-саһархай буолар эбит диэбитэ. Уонна ити эһиги маҕаһыынтан атыылаһар сыырдаргыт барыта кырааска эбиликтээх диир кини", - диэн Хара нэһилиэгин баһылыга Дария Назарова кэпсээтэ.

Бу сыырдар туох даҕаны анал эбиитэ, химията суох оҥоһуллаллар. Атыыга барарыгар салаппааҥҥа угуллан, салгынын оботторон харайыыта уһуур.