Саха сиригэр олохтоох оҥорон таһаарыы кээмэйэ улаатар

Манна хас биирдии көрүҥ ас илиинэн оҥоһуллар уонна саамай сүрүнэ олохтоох бородууксуйаттан. Бу курдук сууламмыт пельмень амтанныын атын, сүмэһиннээх буолар диэн, дьоҕус сыаҕы үлэлэтэр Алексей Герасимов аппараатынан оҥорууга көспөт. Тэрилтэ сүрүн бэйэтигэр ирдэбилэ - сибиэһэй бүгүн оҥоһуллубут аһы сол күн атыылаһааччыга тиэрдии. Онон бу көстөр кэтилиэттэр, пельменнар тута маҕаһыыҥҥа бараллар. 

"Сибиэһэй этинэн оҥорон таһаарабыт. Бу ынах этиттэн фарш кэтилиэт аппараакка киирдэ. Биһиги баҕабыт диэн, холобура, коптильнай аппараакка улахан сылгы этин буһарары, ити биэ, атыыр, мииниллэ сылдьыбыт сылгылар эттэрэ тыа сиригэр хаалан хаалар. Ол технологиятын үөрэтэбит, хайдах гынан улахан, сиппит сылгыны ыламмыт ыыһаан, амтанын тупсаран, кини сымнаҕас буоларыгар үлэлиир технологтардаахпыт бэйэбит. Уонна технолог үөрэхтээх үлэлэһэр доҕоттоордоохпун, кинилэри кытта  ону ырытыһа сатыыбыт", - диир- олохтоох оҥорон таһаарааччы Алексей Герасимов.

2016 сыллаахтан тэриллэн үлэлиир сыахха уопсайа 12 көрүҥ ас оҥоһуллан тахсар. Ол иһигэр Гагаринское диэн ыыһаммыт халбаһыны дьон ордук хамаҕатык ылар. Бу дьоҕус оһоххо күҥҥэ 100 киилэ халбаһы оҥоһуллан тахсар. Онтон кыһыҥҥы өттүгэр убаһа этиттэн тоҥ астар эбиллэллэр.  Тэрилтэ сыллааҕы кээмэйэ 55 туонна.  Алексей Герасимов олохтоох оҥорон таһаарыы арааһын хаҥатыыга үлэлэһэр, онуоха анаан араас холонон көрүүлэри оҥорор. 

Оҥорон таһаарыы арааһын элбэтии уонна хаачыстыбаны үрдэтии билигин судаарыстыба туруорар сүрүн соруга. Ол курдук, тастан киирии бобуулаах кэмигэр бэйэ киэнин улаатыннарар сыал турар.  Ааспыт сылга Саха сиригэр олохтоох оҥорон таһаарааччылар барыта 28 миллиард суммалаах бородууксуйаны оҥорбуттар.

"Ил Дархаммыт инники биэс сылга биһиги иннибитигэр, тыа хаһаайыстыбатын оҥорооччуларга, туруорар сыала-соруга – хас биирдии Саха сирин олохтооҕун остуолугар, толору үрдүк хаачыстыбалаах араас олохтоох бородууксуйа баар буолуохтаах диэн. Биһиги ону ситиһэргэ үлэлиэхтээхпит. Билигин даҕаны аһы оҥорон таһаарааччы тэрилтэлэргэ көмө бара турар. Ол курдук, материальнай-техническэй баазаларын хаҥаталларыгар быйыл федеральнай бүддьүөттэн 33 млн көрүлүннэ уонна Өрөспүүбүлүкэ бүддьүөтүттэн 30 млн.", - диэн  СӨ тыа хаһаайыстыбатын миниистирин солбуйааччы Пётр Попов иһитиннэрдэ.

Олохтоох бородууксуйаны хаҥатар сыалтан сотору кэминэн анал бырагыраамалар үлэлиэхтэрэ диэн туһааннаах министиэристибэ иһитиннэрэр. Бэйэ аһа элбииригэр сири таҥастыыртан саҕалаан, бордууксуйа атыылааччы остуолугар тиийиэр диэри быстыспат ситимнээҕин ыйан туран, тыа хаһаайыстыбатын бары салаатыгар болҕомто улаатыа