Өрөспүүбүлүкэтээҕи уйулҕа киинин көмөтүнэн 9000 киһи туһаммыт

Тапталаах кэргэнэ, аҕалара ийэ дойдутун иннигэр иэһин төлүү сылдьар ыал ийэтэ санаатын бөҕөргөтөөрү, ыар баттык оҥосто сылдьар санаатын-оноотун киэр кыйдаары Өрөспүүбүлүкэтээҕи уйулҕа киинигэр кэлбит. Манна номнуо, хаһыс да ыйын анал байыаннай эппирээссийэҕэ сылдьар дьоммутугар уонна кинилэр чугас дьонноругар анаммыт өйөбүл үлэлэрэ ыытыллаллар. Киин исписэлиистэрэ  госпитальга сытар уолаттарбытыгар эмиэ күүс-көмө буолаллар.

"Барыы-кэлии буолар, холобур, Ростовка бу үһүс бөлөхпүт барда. Сарсын Владивостокка иккис бөлөхпүт барар. Уопсайа госпиталларынан биһиги биэс сырыыны оҥордубут. Психологтар тиийэн волонтердар курдук үлэлииллэр, саллааттарбытыгар көмөлөһөллөр. Психологическай тус консультация ыыталлар", - диир СӨ дьиэ кэргэн уонна ыччат социальнай - психологическай өйөбүлүн киинин мобильнай-кризиснэй сулууспатын оперативнай салаатын сэбиэдиссэйэ Сахаяна Гуляева.

Ол түмүгүнэн, күн бүгүн Ростов на Дону куоракка 103 бааһырбыт байыаннай көмөнү ылбыттар. Манна даҕатан эттэххэ, анал байыаннай дьайыы саҕаланыаҕыттан 9000 киһи киин көмөтүнэн туһаммыт. Билигин уйулҕа киинин исписэлиистэрэ араас сирдэринэн тарҕаһан үлэлииллэр. Биир улахан көмөнөн гражданнары хантыраагынан байыаннай сулууспаҕа сүүмэрдиир биир кэлим кииҥҥэ үлэ буолар.

"Биһиги сыалбыт-сорукпут диэн, хандьытаат ис туругун үөрэтии, туох үөрүйэхтээҕин, туохха сыһыаннааҕын, өйө-санаата төһө сайдыбытын барытын үөрэтэбит. Ол үөрэтэрбитигэр элбэх ньымалары туттабыт, кэтээн көрүү, кэпсэтии, анаалыстааһын, докумуон үөрэтиитэ. Ол кэнниттэн быһаарыы тахсар. Баҕалаах элбэх, күҥҥэ ортотунан уонча киһи кэпсэтиини ааһар, туруктара үчүгэй, санаалара бөҕө уонна туох сыаллаах-соруктаах баран иһэллэрин бары чопчу билэллэр", - диэн СӨ дьиэ кэргэн уонна ыччат социальнай - психологическай өйөбүлүн киинин үлэһитэ  Александр Наумов кэпсиир.

Маны таһынан, СӨ дьиэ кэргэн уонна ыччат социальнай-психологическай өйөбүлүн киинэ судаарыстыбыннай пуонданы кытта ыкса үлэлэһэр. Манна анал байыаннай дьайыы кыттыылахтарыгар эмиэ психологическай өйөбүл ыытыллар.

"Быстах санаа түһүүтүгэр, ис куттал үөскээтэҕинэ уйулҕа үөрэхтээхтэрэ кинилэргэ профессиональнай көмө оҥороллор. Тоҕо диэтэххэ, анал байыаннай дьайыыга сылдьар байыастарбыт чугас дьонноругар сибээстэрэ сүтэн хааллаҕына, эбэтэр арааһынай балаһыанньа тахсан госпитальга киирдэхтэринэ, бу киһи эмоцията аарастык хардарар. Ол онно психолог киһи ис кутун, уйулҕатын сааһылаан, күүс-көмө буларга үлэлиибит" – диэн СӨ дьиэ кэргэн уонна ыччат социальнай - психологическай өйөбүлүн киинин үлэһитэ Элеонора Павлова иһитиннэрэр.

Саха сиригэр Ил Дархан  Айсен Николаев уураҕынан нэһилиэнньэ психологическай доруобуйатын бөҕөргөтүүнэн үлэ көдьүүстээхтик ыытыллар. Компетенция киинэ арыллан, аны билигин бу хайысхаҕа улуустарга үлэ ыытыллар. Бэрт соторутааҕыта, Аммаҕа "Муниципальный психолог" диэн бырайыак чэрчитинэн филиал арыллыбыта. Оттон бу үлэ боростуойа суох, Дойдубутугар улахан улаарыйыы буола турар кэмигэр, олус көдьүүстээҕэ саарбаҕа суох.