Саха сирин быраастара циррозтаах быарга эпэрээссийэ оҥордулар

Хирургтар киһи быарыгар киирэн уустук эпэрээссийэни  оҥороллор. Бу маннык ньыма саамай сүрүнэ киһиэхэ улахан охсуута суох, ол эрэн   эпэрээссийэ биир саамай уустук көрүҥэ буолар.

Өрөспүүбүлүкэтээҕи 2№-дээх балыыһа лучевой диагностикатын киинин быраастарыгар профессор Владимир Шиповский маастар-кылаас ыытта. Манна Саха сирин быраастара циррозтаах быары эпэрээссийэлииргэ үөрэннилэр. Бу маннык уустук эпэрээссийэни Саха сирин быраастара Уһук-Илиҥҥи уокурукка аан бастакынан оҥордулар.

Семён Эверстов, Өрөспүүбүлүкэтээҕи 2-с нүөмэрдээх балыыһа хирург-рентген бырааһа: «Быардара циррозтаах дьон тымырдара хайа баран хааннара барар. Оннук буолбатын гына анал стенд туруордубут. Биһигини бэйэтин эйгэтигэр бастыҥ хирург кэлэн үөрэтэ сылдьар».

Саха сиригэр быар ыарыыта сытыытык турар. Бүтүн өрөспүүбүлүкэ үрдүнэн 500-тэн тахса киһи учуокка турар. Итинтэн 30% номнуо быардарын уларытыыга наадыйаллар. Онтон бу маннык ньыманан эпэрээссийэлэннэхтэринэ 10-ча сыл ыарыыларын умнан, чөл, доруобай туруктаах сылдьыахтарын сөп. Ол эрэн бу маннык ньыма Арассыыйаҕа киэҥник тарҕана илик. Сүрүннээн Москваҕа уонна Краснодарга оҥороллор. Өскөтүн бу оҥоһуллубут эпэрээссийэ табыгастааҕын көрдөрдөҕүнэ, Саха сирин быраастара бу сыл бүтүөр диэри өссө 10-ча эппэрээссийэни оҥоруохтара.

Дыгын Попов, Өрөспүүбүлүкэтээҕи 2-с нүөмэрдээх балыыһа лучевой диагностика киинин сэбиэдиссэйэ: «Туох баар киһи этин-сиинин хаана хаппыт быар нөҥүө кцыайан ааспакка тоҕо барар кутталлаах. Онтон бу эпэрээссийэ улахан тымыры кытары холбуур, боростуойдук эттэххэ быһалыы хааны бырахтарары оҥоробут. Оччоҕо киһи олоҕо тупсар уонна уһуур».

Эпэрээссийэни хаста даҕаны хаана бара сылдьыбыт саастаах киһиэхэ оҥордулар. Онон өссө ыарахан буолла, онтон сотору кэминэн эпэрээссийэ төһө табыгастаахтык ааспыта биллиэҕэ.

Владимир Шиповский, Н. И. Пирогов аатынан Россиятааҕы национальнай-чинчийэр медицинскэй университет профессора, хирург: «Бу олус уустук эпэрээссийэ. Киһи туругар улахан охсуута суох эмтээһини оҥорор сыаллаах. Онон өрөспүүбүлүкэҕэ бүгүн суолталаах күн буолла. Аан маҥнайгытын маннык уустук эпэрээссийэ оҥоһулунна».

Аны мантан ыла Саха сирин быраастара циррозтаах быарга эпэрээссийэни оҥорор буолуохтара, оччоҕуна өрөспүүбүлүкэ нэһилиэнньэтэ өссө биир уустук эмтэниини дойдуларыгар ааһан, Саха сиригэр сытыытык турар ыарыы намырыыр чинчилээх.