Олоҥхо тыйаатыра Татарстаҥҥа ыытыллыбыт фестивальга ситиһиилээхтик кытытынна

300 миэстэлээх көрөр саалаҕа 500 тахса киһи мустубута диэн астына киэн тутта кэпсээнтэн суруналыыстары кытары көрсүһүү саҕаланна. Татарстан өрөспүүбүлүкэтин Болгар куоратыгар ыытыллыбыт "Эпоһы аныгылыы ааҕыы" диэн норуоттар икки ардыларынааҕы фестивальга Олоҥхо тыйаатыра ситиһиилээхтик кыттан кэллэ. Саха норуотун  "Кыыс Дэбилийэ" олоҥхотун тэрээһин кыттыылаахтара олус диэн сэҥээрэ көрбүттэрин, артыыстар үллэһиннилэр.

Мария Турантаева, Олоҥхо тыйаатырын дириэктэрэ: "Олоҥхо тыйаатыра тиийбититтэн, олоҥхо бэйэтэ да Юнеско шедевра буоллаҕа дии, ол иһин сүрдээх үчүгэй болҕомтону уураннар Минтимер Шаймиев бэйэтинэн уонна култуура миниистирэ Ирада Аюпова кытта көрдүлэр. Татарстан олохтоохторо, ыалдьыттара уонна биир дойдулаахтарбыт кэлэн дуоһуйа көрдүлэр".

Татарстан өрөспүүбүлүкэтин кытта Саха сирэ икки сыллааҕыта бииргэ үлэлэһии туһунан сөбүлэҥ түһэрсэн турар. Бу үтүө хамсааһын чэрчитинэн култуураны сайыннарыыга сыһыан эмиэ сайдар. Онон бу фестиваль тэриллиитигэр, граны сүүйүүгэ Олоҥхо тыйаатыра кырата суох кылаатын киллэрбит. Тэрээһин аата да этэринии, эпоһы аныгылыы ааҕыы. Онтон Саха тыйаатыра олоҥхону аныгы көрөөччүгэ сөп түбэһиннэрэн туруорар, тириэрдэр соруктаах тэрилтэ. Маныаха "Кыыс Дэбилийэ" олоҥхо мөккүөрэ суох бу бэстибээлгэ саамай сөп түбэһэр. Режиссер, эрдэтээҥи Кыыс Дэбилийэни оонньообут, Степанида Борисова олоҥхону аныгылыы тыыннаан туруорбутун бэстибээл кыттыылаахтара олус диэн хайҕаабыттар.

Степанида Борисова, "Кыыс Дэбилийэ" испиктээкил режиссера, РФ норуодунай артыыһа: "Миигин кытары артыыс оҕолорбун тэҥнээбэттэрин гына туруордум. Испиктээкил аныгылыы бэйэтэ туспа истииллээх, бэйэтэ туһунан оонньонор. Ол иһин кими да кытта тэҥниир быраап суох".

Бэстибээл кэмигэр Юнеско хас да шедевра тэҥинэн алтыспыт. Ол курдук олоҥхо, манас, калевала уонна Юнеско шөдеврыгар киирбит Болгар куорат бэйэтэ. Суруналыыстары кытары көрсүһүүнү Олоҥхо тыйаатырын төрүттээччи Андрей Борисов иилээн - саҕалаан ыытта.  Онтон култуура миниистирэ Юрий Куприянов Татарстан өрөспүүбүлүкэтин култууратын министиэристибэтин махтал суругун Олоҥхо тыйаатырыгар туттарда.  Маны сэргэ эдэр артыыстар олоҥхо курдук сүдү айымньыны норуокка тириэрдэр, сөргүтэр соруктаахтарын эттилэр. Бэстибээлгэ кыттыыларын үүлэһиннилэр.

Наталья Слепцова, Олоҥхо тыйаатырын артыыһа: "Бу испиктээеили аан маҥнай көрөөччү быһыытынан көрбүтүм. Оччолорго оҕо көрөн олорор кэмим этэ. Уонна испиктээкилгэ кыттыһыахпын олус диэн баҕарбытым. Онтон Степанида Ильинична миэхэ кыра оруол биэрбитэ. Ааспыкка Татарстаҥҥа көрөөччүлэр мин курдук харахтарынан астыммыттыы көрөн олорор этилэр. Минтимер Шаймиев: “Мин хайа эмэ кыра оруолу бу туруорууга оонньуом этэ”-, диэн эппитэ".

Пресс-конференция түмүгэр Олоҥхо тыйаатыра саҥа дьиэҕэ киирдэҕинэ аныгылыы тиэхиникэни дьүөрэлээн өссө үрдүк үктэлгэ тахсарын, ыччаты сыһыарыыга кыах өссө улаатырын эттэ