"Энергетик" оҕо лааҕыра 55 сылын бэлиэтиир

Оҕолорго ураты долгутуулаах күн. Бу күн кинилэр ыҥырыылаах ыалдьыттарга кэнсиэр көрдөрдүлэр, арааһынай көрдөөх оонньуулары оонньоттулар. 1968 сыллаахха төрүттэнэн, бу кэмҥэ диэри өрөспүүбүлүкэ үрдүнэн 7 саастарыттан 16-гар диэри оҕолору түмэр. Оҕо сайыҥҥы сынньалаҥын туһалаахтык атаарара - бу инникитин ситэн-хотон, киһи буола үүнэригэр биир улахан дабайыы буолар. Лааҕырга хайдах күннэрин атааралларын туһунан Горнай улууһуттан Артём Левин үллэстэр.

Артём Левин, "Энергетик" лааҕыр иитиллээччитэ: «Мин бу лааҕыртан олох барыахпын баҕарбаппын. Табаарыстарбын ахтыам. Ол иһин аныгыскы сезоҥҥа эмиэ сылдьыахпын баҕарабын. Хас күн аайы араас тэрээһиннэр буолаллар».

Лааҕыр үбүлүөйдээх сылыгар бастакы дириэктэрдэр, «Сосновый бор» салайааччыта, үөрэх уонна ыксаллаах быһыы-майгы министиэристибэтиттэн кэлэн ыалдьыттаатылар. Өр сылларга оҕо сайдар киинигэр, оҕолору кытта үлэлэспит баһаатайдарга, баспытааталларга үөрэх министиэристибэтиттэн махтал сурук уонна анал бэлиэ туттарылынна.

Айлана Максимова, "Энергетик" лааҕыр баһаатайа: «Бу лааҕырга үлэлээбитим иккис сылым буолла. Бастаан көмөлөһөөччүнэн киирбитим. Оскуола сааспыттан олус көхтөөхпүн. Ол курдук коммунарскай хомуурдары көтүппэтим. Уонна ол сылдьан баһаатай үлэтин олус сөбүлүү көрөммүн үлэҕэ киирбитим».

Лааҕырга араас-араас оҕолор мустан, бары биир баһаатай иллээх кынатын анныгар киирэллэр. Ким ырыаҕа, ким үҥкүүгэ, ким спортивнай секцияларга диэн суруттараллар. Оҕо эргиччи сайдан тахсарыгар хас биирдии лааҕыр үлэһитэ бэйэтин кыһатын толору ууран туран үлэлиир.

Зоя Корнилова,"Энергетик" лааҕыр музыкальнай салайааччыта: «Лааҕырга кэлбит оҕолору кытары олус таһаарыылаахтык биир тэтиминэн үлэлиибит. Миигин оҕолорум олус кэтэһэллэр, сарсыарда аайы көрсөллөр. Онон биһиэхэ эмиэ олус истиҥ».

Билиҥҥи сменаҕа уопсайа 240 оҕо сылдьар, олортон смена аайы 80-на анал байыаннай эпэрээссийэҕэ кытта сылдьар дьон оҕолоро буолаллар. "Создавай и вдохновляй" диэн ааттаах сменаҕа оҕолор айар дьоҕурдарын сайыннарыыларыгар аналлаах  буолла. Оттон ааспыт ыйга экология министиэристибэтин кытта экология сменатын арыйан ыыппыттара.

Михаил Лукашов, "Энергетик" лааҕыр салайааччыта: «Оҕолор араас куруһуоктарга дьарыктаналлар. Лааҕырбытыгар хореография, ырыа, спортивнай, уруһуй куруһуохтара үлэлииллэр. Онон оҕолор наар дьарыктаахтар».

7 куорпуһунан 35-тии оҕо 7 араас этэрээккэ хайдыһан сайыннарын туһалаахтык атаараллар. Маннык номнуо 55 сыл устата тэтимин ыһыктыбакка бэйэтин үлэтин салгыыр.

Тиэргэн иһигэр урукку-хойукку оҕо саас ырыалара мустубут ыалдьыттар сүргэлэрин көтөхтө. Оҕо саас күлүм гынан ааһар түгэнин бу күн мустубут дьон уйадыйан, ис-истэриттэн долгуйан ахтан аастылар.