Сууралдьыма Куо быыстапката Саха түмэлигэр үлэлиир

Суруйааччы биир биллэр айымньытынан "Уруу ыһыаҕа" буолар. Бу хартыына 1998 сылтан 2023 сыллаахха диэри 25 сыл устата уруһуйданна. Хартыына суруллуон иннинэ худуоһунньук Илин Эҥэр түмэллэрин барытын кэрийэн 17-19 үйэтээҕи сахалыы таҥаһы дириҥэтэн үөрэппитэ. Бу хартыынаҕа 100-тэн тахса киһи уруһуйданна, киһини сөхтөрөрө диэн биир даҕаны киһи, кыыл-сүөл таҥаһа хатыламмата.

Александра Бокчарева-Иннокентьева - Сууралдьыма Куо,  худуоһунньук: "Төрүттэрбититтэн кэлбит искусствобытын сөргүтүөххэ диэн санааммын, кэлэр кэнчээри ыччакка биһиги тугу хаалларбыт диэн? Ол иһин ол санааттан таҥаһынан киирбитим. 17-19 үйэлэр таҥастарын хомуйаммын бу “Уруу ыһыаҕа” диэн хартыынабын суруйдум".

Дьоҕус быыстапкаҕа уопсайа 40-чэ кэриҥэ худуоһунньук хартыыната көрдөрүүгэ турда. "Бохсуруйуу" диэн ойуун кыыра турар хартыынатын бэлэх быһыытынан саха түмэлигэр туттарда. Улуу Кудаҥса удьуорун салҕааччы, Тэйэр хайа тэллэҕэр сууланан улааппыт айар куттаах, дьоҕурдаах худуоһунньук - Сууралдьыма Куо хартыыналара Аан дойдуну биир гына тарҕаннылар. Саха итэҕэлин, олоҕу көрүүтүн хартыыналарыгар киэҥ далааһыннаахтык тарҕатан, добун биһирэбили ылан быыстапкатын норуотун дьонугар таһаарда.

Александра Бокчарева-Иннокентьева - Сууралдьыма Куо,  худуоһунньук: "Бу үлэлэр араас сиртэн хомуллан кэллилэр. Сорохторо суруоллуохтарыттан ыла чааһынай бас билиигэ барбыттара. Сорохтор Монголия быыстапкатыттан алталыы сыл буолан баран кэллилэр. Хас биирдии худуоһунньук бэйэтэ туспа суоллаах-иистээх. Биһиги Саха сирин худуоһунньуктара наһаа дьоллоох дьоммут. Ким да кимиэхэ да майгыннаспат, бары уратыбыт".

Саха оччотооҕу олоҕун барытын Өксөкүлээх хотойун курдук ытыс үрдүгэр ууран олорон хоһуйбута элбэх киһини сөхтөрдө. Айар үлэтин сүгүрүйээччилэр Саха сирин араас муннуктарыттан кэлитэлээтилэр.

Айархаан, Нерюнгри куорат олохтооҕо: "Ийэ дойдуну көрүүтэ олох атын эбит. Холобура, Чурапчы көһөрүүтүн туһунан көрүүтэ уруһуйугар баар. Онно олох чопчу дьон ис туругун көрдөрөр, киһи дууһатын таарыйар". 

Хас биирдии хартыынатын уруһуйдуон иннинэ дьүһүйүү чопчу буолан ааспыт сиригэр-уотугар сылдьан, энергетикатын билэн эрэ баран уруһуйдуур. Холобур, Чурапчы көһөрүүтүн кыттыылаахтарын кытта кинилэр суолларынан сылдьыһан, барытын бэйэтинэн аһарыммытын кэпсээн ааста.  Кини дойдутун дьонун харах уулаах түбэлтэтин 5 хартыынаттан турар серия оҥорон уруһуйдуур баҕа санаалаах. Күһүҥҥү тымныыга дойдуларыттан тэйиилэрин, өрүскэ кэтэһиилэрин, кыһыҥҥы балыктааһыннарын.

Светлана Егорова – Тулуйхаана, суруйааччы: "Кини хартыына суруйарын таһынан, хоһоону эмиэ олус табыллан суруйар. Мин ону наһаа сөҕөбүн. Кини хоһооннорун тыллара сүрдээх ис иһиттэн тахсар күн аайы туттубат тылларбыт".

Саха мындыр толкуйун хартыыналарыгар дьүһүйбүт Айыылартан айдарыылах Сууралдьыма Куо быыстапката кэлэр ый 7 күнүгэр диэри буолуоҕа.