Хатаска аҕам саастаахтар эрэ кэтэх сүөһүнү туталлар

Сарсыарда эрдэ, төһө да ардахтаах күн турдар, үүт туттарааччыларга ханнык да айылҕа мэһэйэ күннээҕи үлэни тохтоппот. Хатас үүтү тутар пуунугар хара сарсыардаттан үлэ күөстүү оргуйар. Манна олохтоох дьон сарсыардааҥы ыамнарын биирдии-биирдии аҕалан, кыра да буоллар дохуот аахсаллар. Хатас нэһилиэгин олохтооҕо Спартак Окороков күннэтэ 4 ыанар ынаҕын ыан, үүт туттаран дьиэ кэргэнин аһатар.

Спартак Окороков, үүт туттарааччы: «Күннэтэ 50 лиитэрэни туттарабын. Онтон ордубутун бэйэм сүөгэйдиибин уонна оҕолорбор биэрэбин, маҕаһыыҥҥа атыыга таһаарабын. Үүт харчыта киирэ турара олус үчүгэй». 

Хатастар үүттэрин алтынньы ыйыгар диэри туттараллар. Онон син сыллааҕы былаан туолар. Сарсыарда 7 чаастан саҕалаан биир-биир үүттэрин аҕалан кээмэйдэппиттэрин кэннэ, массыына кэлэн үүттэрин собуокка илдьэр.

Агафья Черноградская кооператив тэринэн бэйэтин эрэ ынахтарын үүтүн буолбакка, нэһилиэк үүтүн барытын тутан, Дьокуускайдааҕы үүт собуотун кытары дуогабар түһэрсэн үлэлии-хамныы сылдьар. Өскөтүн инники сылларга 30-тан тахса киһи үүт туттарар эбит буоллаҕына, билигин 11 эрэ буолан хаалбыттар. Бу барыта бүтэһик сылларга тыа хаһаайыстыбатыгар буолбут уларыйыылар охсуулара. Онон чааһынай ынах-сүөһү иитээччилэргэ билигин үлэлии турар быраабылалар олох табыгаһа суохтар диэн кооператив салайааччыта санаатын үллэстэр.

Агафья Черноградская, "Хатас"  тыа хаһаайыстыбатын кооперативын бэрэссэдээтэлэ: «Ыарахаттар наһаа элбэхтэр. Бырабыыталыстыба уурааҕынан ынах төбөтүгэр бэриллэр 35 тыһыынчаны ылбыттар олох үүт туттарбаттар. Дьиҥэ ити харчылара окко да тиийбэт».

Хомойуох иһин эдэр дьон ынах-сүөһү көрүүтүнэн дьарыктаммат. Онон саастаах дьон хайдах кыалларынан, төһө кыах баарынан үрүҥ илгэни сомсоллор. Үүт туттарааччылар сарсыарда аайы кэпсэтэр тиэмэлэрэ биир. Кыстык отун булунуу кыһалҕата. Былырыын ходуһаларын ууга былдьатан, былааннаммыт отторун оттообокко, атын сиртэн от атыылаһарга күһэллибиттэрэ, быйыл эмиэ хартыына соччото суох.

Андрей Лапшин, үүт туттарааччы: «Быйыл олус ардахтаах сайын буолла. Күн бүгүнүгэр диэри оппут оҕустара да иликпин. Күн-дьыл туругун көрдөххө соччото суох. Буруолаах отунан кыһын аһаттахпыта, сүөһүлэрим охтор кутталлаахтар».  

Уопсайа өрөспүүбүлүкэ үрдүнэн быйыл 64 тыһыынча туонна үүтү ылар сорук турар. Онтон бүгүҥҥү күннээххэ 30-ча тыһыынча туонна туттарылынна, ол аата бэриллибит былаан сөпкө баран иһэр диэн тыа хаһаайыстыбатын министиэристибэтэ иһитиннэрэр.