Верхоянскай куоракка быраастар үлэлээтилэр

Тамара Афанасьевна Горохова киин куораттан быраастар кэлбиттэригэр анаан-минээн доруобуйатын көрдөрүнэ кэллэ. Кини аан бастакытын фармаколог бырааска сырытта. Верхоянскай балыыһатыгар үгүс исписэлиис тиийбэт буолан дьон эминэн-томунан бэйэтэ дьиэтигэр эмтэнэр.

Тамара Горохова, Верхоянскай куорат олохтооҕо: «Фармаколог бырааска сырыттым. Олус туһалаах исписэлиис эбит. Холобура, биһиги эми хонтуруола суох иһэбит. Маннык быраас эрдэ кэлэ илик. Мин элбэхтик кэлбэппин барбаппын, онон маннык мисэтэтигэр кэлэн көрөллөрө олус үчүгэй».

Кырдьык да,  Верхоянскай куорат хоту эҥэр турар буолан манна киин куораттан быраастар үгүстүк кэлбэттэр. Сылга биирдэ-иккитэ кэлэн бараллар, ол эрэн бары исписэлиис буолбатах. Холобура, бу фармаколог быраастан элбэх киһи конультация ылла, генынан бэриллэр ыарыыларга анаализтары туттардылар.

Ольга Васильева, өрөспүүбүлүкэтээҕи 3-с нүөмэрдээх клиническэй балыыһа фармаколог бырааһа: «Олохтоохтортон генынан бэриллэр ыарыы туһааннаах эмп дьайыытыгар сабылыадын быһаарар анаализтары ыллыбыт».

Оттон гинеколог быраас дьахталлартан ВПЧ диэн анаалиһы ылла. Бу дьахтар төрүүр-ууһуур уорганыгар искэҥ ыарыытын эрдэттэн сэрэтэр, көрдөрөр анаализ буолар. Манна даҕатан эттэххэ, Верхоянскай куораттааҕы балыыһаҕа лаборант суох буолан олохтоохтор ханнык да анаалиһы манна туттарбаттар. Онон оройуон киинигэр Баатаҕайга баран туттарарга күһэллэллэр. Уопсайынан кэнники сылларга оптимизация диэн буолан балыыһаҕа үлэһит ахсаана аҕыйаан турар.

Зоя Потапова, Верхоянскай куорат балыыһатын акушер бырааһа: «80-с сылларга манна улахан балыыһа этэ. Гинеколог – быраас, тиис бырааһа, терапевт, хирург, оҕо бырааһа бааллара. 53 ыарыһах сытан эмтэнэр кыахтааҕа. Лабораммыт олохтон туораабытын кэннэ солбуйар киһи суох буолан анаализ оҥоһуллубат. Кини сиэн кыыһа билигин Дьокуускайга үөрэнэ сылдьар. Ол эрэн биһиэхэ аныыллара биллибэт. Оройуоҥҥа ылыахтарын сөп».

Билигин балыыһа уопсайа 22 үлэһиттээх, ол эрэн ыстаатка оҕо бырааһа уонна участковай терапевт эрэ баар. Маныаха Верхоянскай куорат статустаах буолан манна тыа сиригэр үлэлиир араас бырагыраамалар үлэлээбэттэр. Холобура, «Земскай дуоктар» бырагырааманан үлэһиттэр бөһүөлэктэргэ, биитэр оройуон киинигэр ананан кэлэллэр. Онон сыллата Дьокуускайтан кэлэр быраастарга нэһилиэнньэ төһө кыалларынан бары көрдөрүнэллэр. Бу кэлбит быраастар дьон доруобуйатын эрэ көрөрүнэн муҥурдамматылар, өссө быраастарга, нэһилиэнньэҕэ семинар ыыттылар.