Сөҥүүнү күүһүрдэн ойуур баһаардарын умуруоруу

Кэлиҥҥи кэмҥэ ойуур баһаардарын көрдөрүүтэ олус элбээн, икки сыллааҕыта сана сүүрээн этии киллэриллэн, билигин олоххо туттуу көдьүүстээхтик ыытыллан саҕаланна. Ол курдук, күнү-дьылы кэтиир сулууспаны кытары Саха өрөспүүбүлүкэтин Быыһыыр сулууспата итиэннэ "Хотугу авиалиниялар" авиахампаанньа  бииргэ сомоҕолоһон сөҥүүнү кытары үлэлэһэллэр. Бу үөрэххэ анаан көтөр аалга үлэлиир дьоннор бэлэмнэниллэн, билигин үлэ күөстүү оргуйар. Зондировщик-сөмөлүөккэ бастакы үлэлиир хараҥаччылар Быыһыыр сулууспа үлэһиттэрэ.

Максим Портнягин, СӨ быһыыр сулууспатын ыксаллаах быһыы-майгы үөскүүрүн кэтиир отделын салайааччыта: "2021 сыллаахха баһаардары умуруорууга ардаҕы күүһүрдэр сөмөлүөттэри туһаныы уурааҕа кэлбитэ. Ол чэрчитинэн үөрэх барбыппыт. Москва куоракка Киин аэрологическай обсерваторияҕа метеоролог үөрэҕин ааспыппыт ону сэргэ пиротехник кууруһун ааспыппыт. Ону сэргэ 100 чаас көтүүгэ сылдьыбыппыт. Онтон быйылгыттан саҕалаан бэйэбит кыралаан көтөбүт".

Чахчы аҕыйах кэм иһигэр үлэ көдьүүстээҕин биллэрдэ. Онно төһүү Быыһыыр сулууспа ыксаллаах быһыы-майгы үөскүүрүн кэтиир салаата. Манна даҕатан эттэххэ, тустаах салаа үлэһиттэрэ ханна уот ордук күүскэ турбутун спутник нөҥүө көрөн, суһаллык бу утары үлэ барар.

Владимир Семенов, СӨ быһыыр сулууспатын ыксаллаах быһыы-майгы үөскүүрүн кэтиир салалтатын салайааччыта: "Нэһилиэнньэлээх пууннарга куттал суоһуур дуу суох дуу диэн кэтээн көрүүнү ыытабыт уонна сылыктааһын оҥоробут. Исписэлиистэр Нестерев шкалатынан хас кылаастаах баһаар суоһуур куттала тириирин быһаараллар. Оччоҕо биһиги сэрэтии ыытабыт".

Холобура, бу ситимнээх үлэ түмүгэ Өлүөхүмэ уонна Томпо улуустарыгар көдьүүстээҕин көрдөрдө. Сөҥүү түһэн улахан уот умулларыллыбыта.

Иван Андросов, СӨ быһыыр сулууспатын салайааччыта: "От кэмигэр биһиги ыппаппыт. Биһиги сулуупабыт ааттыын да быһыыр сулууспа, онон дьоҥҥо көмөлөһөр сыаллаах үлэлиибит. Балабыай былыттары ыппаппыт. Уус Майа, Алдан, Нерюнгри  умуллубатахтарына онно уонна хоту үлэлиэхпит. Халыма эҥэр олох былыппыт суох, онон ытар кыаҕа суох сылдьабыт".

Күн бүгүн зондировщик көтөр аал уопсайа 31 көтүүнү оҥордо. Үлэ өссө да салҕанар.