Хатырыкка баараҕай тутуу

Саҥа тутуллубут комплекска уопсайа 4 тэрилтэ киирэн үлэлиэхтэрэ. Ол курдук 150 миэстэлээх "Сайдам" норуот айымньытын дьиэтэ, элбэх көрүҥү батарар улахан успуорт саалата, 60 миэстэлээх Намнааҕы оҕо ускуустубатын оскуолатын филиала уонна 20 ааҕар миэстэлээх, 10 тыыһынча туом кинигэ уурар сирдээх бибилэтиэкэ киириэхтэрэ. Маны таһынан тутуу бастакы этээһигэр түмэл, архыып, медиацентр, костюмернай уонна да атын хайысхалар сайдар кииннэринэн буолуоҕа.

Иван Евстафьев, тутуу хонтуруолун инженера: "Манна түөрт тэрилтэ киирэр буолан тутарга уустуктанна. Ол курдук итиитэ, уута-хаара, уота-күөһэ түөрт тэрилтэҕэ тус-туспа киириэхтээх. Билигин ол үлэтэ бара турар. Ис өттүн сыбаҕын оҥоро сылдьабыт.  "

Челябинскайтан кэлиэхтээх европлита атырдьах ыйыгар биирдэ кэлэр буолан, эбийиэк тас бүрүөһүнүн оҥоруутуга кыра хаалыы баар диэн бэлиэтииллэр. Ол эрээри тутуу бэйэтин хаамыытынан болдьоҕун баттаһа ситэн иһэр. Кэлэр ыйга дьиэ иһинээҕи толору хааччыллыыта түмүктэниэҕэ, оттон билигин салгылатыы, сылааһынан хааччыйыы, уоту тардыы үлэлэрэ бара тураллар.

Үлэһиттэр саҥа уораҕайга киирээри долгуйа сылдьаллар. "Сайдам" норуот айымньытын дьиэтэ 2016 сыллааха хаарбах туруктаах дьиэлэр ахсааннарыгар киирэн сабыллыбыта. Онтон ыла ханна миэстэ баарынан үлэлэрин тиһигин быспакка үлэлии-хамныы сылдьаллар. Билигин номнуо бэйэлэрин саҥа кииннэригэр киирэллэрин кимнээҕэр да ордук күүтэллэр.

Елена Ефремова, "Сайдам" норуот айымньытын дьиэтин салайааччыта: "Таас уораҕайбыт этэҥҥэ болдьоммут кэмигэр үлэҕэ киириэ диэммит эрэнэбит. Биллэн турар, туох барыта үгүс үлэттэн тахсар. Ил Дархаҥҥа Айсен Сергеевичка махталбытын тириэрдэбит".

Нэһилиэккэ тутуу манан эрэ муҥурдаммат. Хатырык орто оскуолатыгар 10 мөлүйүөн суумма көрүллэн хапытаалынай өрөмүөн бара турар. Сүрүн уларыйыытынан ититии ситимэ, баһаарынай кирилиэстэр уонна оскуола ис өттүн тупсарыыта, сырдатыыта буолар. Маны таһынан 4 мөлүйүөн суумма саҥардыыга уонна тиэхиньикэни ылыыга көрүлүннэ. Бу күһүн кэлэр үөрэнээччилэр саҥа паартаҕа, олоппоско олорон үөрэниэхтэрэ.

Павел Тимофеев, М. К. Аммосов аатынан Хатырык орто оскуолатын дириэктэрэ: "Былаан быһыытынан үлэ бара турар. Атырдьах ыйын 15 күнүгэр үлэбит барыта түмүктэниэхтээх. Билии күнүгэр оҕолору саҥа өрөмүөннээх оскуолаҕа көрсөрсүөхтээхпит".

Максим Кирович Аммосов төрөөбүт сиригэр-уотугар сайдыы балысханнаахтык бара турар. Тутуу чааһа болдьохтон хаалыыта суох этэҥҥэ бара турарыттан олохтоохтор үөрэллэр.