Арктикатааҕы десант: дьоҥҥо көмөлөһөр сыаллаах

Лена Николаевна Соловьева ааспыт сылтан тута сылдьыбыт баҕа санаатын - православнай итэҕэли ылынна. Итиэннэ кинини кытта тэҥҥэ төрөппүт кыыһа сүрэхтэннэ.

Лена Соловьёва, Верхоянскай куорат олохтооҕо: "Сүрэхтэнии кэннэ иккистээн төрөөбүт курдук буоллум. Туох баар бу сылларга тута сылдьыбыт ыарахан санаам барыта сүтэн хаалла. Олус чэпчээммин көтүөх курдукпут".

Оттон бу күн Лена Николаевна курдук православнай итэҕэли оҕолуун-уруулуун хас да киһи ылынна. Манна Чульман бөһүөлэк аҕабыта Владимир анаан-минээн кэллэ. Кини итэҕэллээхтэргэ сулууспаны уонна мэлиибэни ыытта.

Владимир, Чульманнааҕы Князь-Владимирскай таҥара дьиэтин аҕабыта: "Икки күн устата сүрэхтээтибит. Бэҕэһээ 6 киһи итэҕэли ылынна, онтон бүгүн биир уол уонна биир хараҕынан мөрбөт эмээхсини дьиэтигэр сүрэхтээтибит".

Маныаха Верхоянскай куоракка кэнники сылларга буолбатах, историяҕа хаалар бэлиэ түгэн буолла. Ол курдук, Екатерина уонна Игорь бииргэ 10 сыл олорон баран бэргэһэлэнии сиэрин-туомун аастылар.

Арктикатааҕы десант Дьааҥы улууһугар сүрүн сыалынан "Арктика волонтердара" оҕо сайыҥҥы лааҕырын үлэлэтии буолла. Манна барыта 40-ча кэриҥэ оҕо сылдьан бастакы суһал медицинскэй көмөнү оҥорорго үөрэннилэр. Биир сайыҥҥы нэдиэлэни туһалаахтык атаардылар.

Анастасия Попова, Арктика десанын "Артика волонтердара" хамсааһынын кыттыылааҕа, оҕо лааҕырын уһуйааччыта: "Бастакы көмө туһунан кэпсээтибит. Суһал көмөнү оҥорууну үөрэттибит уонна тыын киллэриитин оҥорон көрдөрдүбүт. "

Олохтоох оҕолор бастакы суһал медицинскэй көмөнү оҥорорго үөрэммит эбит буоллахтарына, улахан дьон доруобуйатын көрдөрүннэ. Ол курдук, Арктикатааҕы десант иһинэн "Долго жить" диэн бырайыак үлэлээтэ. Бу бырайыак иитинэн киин куораттан фармаколог уонна гинеколог быраастар кэлэн хас да күн нэһилиэнньэни көрдүлэр. Туһааннаах анализтары ыллылар.

Сардаана Киприянова, өрөспүүбүлүкэтээҕи 3-с нүөмэрдээх клиническэй балыыһа акушер-гинеколог бырааһа: "Дьааҥы улууһугар 300 тахса кэрэ аҥартан туһааннаах аналиһы туттубут. Бу анализ дьахтар төрүүр – ууһуур уорганыгар араак ыарыы тахсыытын эрдэттэн сэрэтэр сыаллаах оҥоһуллар. Бу бырайыакпыт 2021 сыллаахтан ситиһиилээхтик үлэлиир. Күн бүгүн 7 дьахтарга искэҥ ыарыыта бигэргэннэ".

Оттон аҕабыттаах ийэбит Дьааҥы улууһугар таҥара иннигэр ытык иэстэрин толордулар. Ол курдук, 19-с үйэҕэ тутуллубут чочуобунаҕа мэлиибэни ыыттылар итиэннэ Көстөр диэн хайаҕа тиийэн, ааспыт үйэ 40-с - 50-с сылларыгар турбут ГУЛАГ-ка өлбүт хаайыылаахтары кэриэстээтилэр.

Елизавета (Сеньчукова) ийэбит, Дьокуускайдааҕы епархия пресс-сэкирэтээрэ, "Арассыыйа Арктиката: сомоҕолоһуу төрдө - элбэх буолууга" бырайыак сүрүннүүр үлэһитэ: «Дааҥы улууһугар 2003 сыллаахха туруоруллубут кириэс баар. Репрессияҕа сырдык тыыннара быстыбыт дьоҥҥо анаан туруоруллбут».

Онон нэдиэлэ устата Арктикатааҕы десант Дьааҥы улууһун бэлиэ сирдэрин, Верхоянскай куорат нэһилиэнньэтин хабан үлэлээтэ. Манна даҕатан эттэххэ, тустаах бырайыак сыллата хоту эҥэр улуустарыгар үлэлиир. Хас биирдии улууска бырайыак тиэмэтэ уларыйар, ол эрэн сыала-соруга биир - дьоҥҥо көмө. Аны сотору кэминэн Арктика десана Эбээн Бытантай уонна Аллараа Халыма улуустарыгар тиийиэҕэ.