Оҕолорго суолга куттал суох буолуутун көҕүлүүр бэстибээл ыытылынна

Үһүс этабынан вело-эстафета ыытыллынна. Суолга куттал суох буолуутун кэтиир иниспиэксийэ үлэһиттэрэ  оҕолорго суол быраабылатын, сатыы киһи суолга туохха болҕомтону ууруохтааҕын туһунан эстафета тэрийэн ыыттылар. Сайыҥҥы бириэмэҕэ болуоссакка, уулуссаҕа элбэх киһи самокатынан, велосипедынан сылдьар. Олортон суол быраабылатын сөпкө тутуһар киһи ахсааннааҕа билиннэ. Суолу туоруур киһи велосипедыттан түһэн, сатыы барыахтаах. Бу боростуой быраабыланы улахан да дьон, оҕолор даҕаны хатылыы тураллар.

Павел Федулов, ИДьМ сокуоннай саастарын ситэ илик оҕолору көрөр-истэр полиция салаатын аҕа инспиэктэрэ: "Бу бэстибээл быйыл 14 сылын ыытыллар. Уопсайа барыта 5 хамаанда. "

Быйылгы дьылга велосипедтаах оҕо суол быраабылатын кэспитин түмүгэр 90%-нара эчэйиини ылла. Төрөппүттэр болҕомтото суох сыһыаннара оҕо олоҕор улахан кутталы суоһуур. Сайыҥҥы бириэмэҕэ күрүө таһыгар диэн оҕону улахан дьон көрүүтэ-истиитэ суох көҥүл ыыталлар. Онуоха 7-14 саастарыгар диэри булгуччу төрөппүт хараҕын далыгар тротуарынан сылдьара көҥүллэнэр, оттон 14 сааһыттан анал велосипед суолунан сылдьыахтаах.

Владилена Охлопкова, Дьокуускай куорат суолга-иискэ салалтатын сэрэтэр үлэҕэ салаатын иниспиэктэрэ: "Оҕолор бу күрэххэ бэлэмнэнэ, кытта сылдьаннар суол быраабылатын, чуолаан велосипедынан сылдьыы быраабылатын саныыллар".

Бу түмүгэр оҕолор улахан аҥардара тутуһуллуохтаах, ирдэнэр быраабыланы билэллэрин көрдөрдүлэр. Хас биирдии хамаанда бэйэтэ туспа анал хаһыылаах-ыһыылаах ыалдьааччылаах буолан биэрдэ.

Дьулус Кондаков, велоэстафета кыттыылааҕа: "Велосипедынан сылдьыы быраабылаларын өссө төгүл чиҥэттим уонна ыйытыыларга хоруйдаатым".

Маннык тэрээһин оҕо сайыҥҥы сынньалаҥар бириэмэтин туһалаахтык аттарынарыгар улахан көмө буолар. Оҕо улаатан эрэр сааһыгар олоххо сөптөөх интэриэһи көбүтэн, оҕолору сөптөөх суолга тайыннарар.

Наталья Петрова, Дьокуускайдааҕы оҕо киинин дириэктэрэ: "Куораппыт кырачаан олохтоохторун суол быраабылатыгар сыһыарыы улахан суолталаах. Оҕолор билигин самокаттаах, велосипедтаах сылдьыылара үгүс. Онон суол быраабылатын билэллэрэ ирдэнэр".

Бэстибээл от ыйын устата ыытыллар. Ый түмүгэр Орджоникидзе аатынан болуоссакка улахан тэрээһин ыытыллыа. Хас түһүмэх аайы бэйэлэрин туйгуннук көрдөрбүт хамаандалар полиция отделын аатыттан анал бириистэри ылыахтара, ол туһугар хамаандалар бириистээх миэстэ уонна муҥутуур кыайыылаах иһин күрэхтэһэ сылдьаллар. Оттон велоэстафета түмүгэр суол быраабылатын үчүгэйдик билбит үс хамаанда минньигэс бирииһинэн уонна мэтээлинэн наҕараадаланнылар.