Суһал көмөнү оҥорууну үөрэтэр лааҕыр үлэлээтэ

Бастакы суһал медицинскэй көмөнү оҥоруу сатабылыгар үөрэнии. Бу тустаах оҕо лааҕырын сүрүн хайысхата. Оҕолор уочаратынан кэлэн бастакы дьарыкка тугу билбиттэрин тутатына оҥорон көрөллөр. Уһуйааччы Анастасия Попова бэйэтэ медицинскэй институт устудьуона итиэннэ Красный крест тэрилтэ үлэһитэ, лааҕыр баһаатайа хас биирдии оҕоҕо өйдөнүмтүөтүк быһаарар, көрдөрөр.

Анастасия Попова, Арктика десанын Артика волонтердара хамсааһынын кыттыылааҕа, оҕо лааҕырын уһуйааччыта: “Бастаан оҕолору кытта билистибит. Суһал көмөнү оҥоруу туһунан кэпсээтибит. Өйө суох киһиэхэ тыын киллэриини көрдөрдүбүт. Оҕолор олус көхтөөхтүк дьарыктарга кытыннылар”.

Лааҕырга күн бастакы аҥарыгар оҕолор суһал көмөнү оҥорорго үөрэнэллэр, оттон иккис аҥарыгар эти-хааны эрчийэр оонньууларга көхтөөхтүк кытталлар. Үөрэх чааһа дьиэ иһигэр буолар эбит буоллаҕына, оонньуур бириэмэни таһырдьа сибиэһэй салгыҥҥа атаараллар. Төһө да хоту эҥэр сөрүүн күннэр турдаллар, олохтоох оҕолор онтон чаҕыйбаттар. Үөрэ-көтө таһырдьа оонньууллар. Ян Слепцов быйыл бэһис кылааһы ситиһиилээхтик бүтэрбит.

Кирилл Слепцов, Верхоянскай орто оскуолатын үөрэнээччитэ, Арктика десанын лааҕырын иитиллээччитэ: "Эрдэ суһал көмө туһунан үөрэҕи эмиэ ааспыппыт уонна телевизорга көрөн эмиэ билэбит".

Арктика десанын лааҕырын үһүс күнүгэр сибэтиэй Мотуруона Московская таҥара дьиэтигэр  оҕолорго экскурсия ыытылынна. Манна аҕабыыт Владимир кинилэргэ анаан храм, православнай итэҕэл туһунан сиһилии кэпсээтэ. Итиэннэ биир умнуллубат түгэнинэн оҕолор чочуобунаҕа баар куолакаллары  тыаһатарга холоннулар.

Маны таһынан лааҕыр иһинэн "Моя Арктика" диэн уруһуй күрэҕэ ыытылынна. Манна ордук үчүгэй үлэлээх оҕолорго сыаналаах бириистэр туттарылыннылар итиэннэ талыллыбыт уруһуйдары тэрийээччилэр Дьокуускайдааҕы Епархия дьиэтигэр илдьэн ыйыахтара.

Оттон тустаах лааҕыр сүрүн чааһа, суһал көмөнү оҥоруу бу Саха сиригэр Бүлүү улууһугар буолбут түбэлтэҕэ олоҕурда. Ол курдук, икки оскуола оҕолоро тыаҕа сылдьан биирдэрэ өйүн сүтэрбитигэр, иккис уол тута суһал көмөнү оҥорон доҕорун быыһаабыта. Онон  тэрийээччилэр хас биирдии оҕо суһал көмөнү оҥорору сатыахтаах диэнтэн сиэттэрэн маннык лааҕыры үлэлэттилэр.

Нина Барашкова, Арктика десанын лааҕырын салайааччыта: "Былырыын эмиэ бу улууска үлэлээбиппит. Онтон быйыл оҕолорго туох ордук наадалаах буолуо сөбүн үөрэтии түмүгэр “Волонтеры Арктики” диэн бырайыагы тэрийдибит. Манна оҕолорго суһал көмөнү оҥоруу сатабылларын көрдөрдүбүт".

Онон биир нэдиэлэ устата оҕолор суһал көмөнү оҥорорго үөрэннилэр. Түмүккэ эксээмэн туттаран өссө сертификат ыллылар. Оттон бүтэһик күн лааҕыр үөрүүлээх сабыллыытыгар үчүгэй көрдөрүүлээх оҕолору чиэстээтилэр, тыалга көтүтүллэр оҥоһуктар бэстибээллэрэ ыытылынна итиэннэ минньигэс астаах сотуол тэрилиннэ.