"Коркин. Андаҕар" испэктээк Саха тыйаатырын сыанатыгар туруо

Испэктээк 2 састаабынан оонньонуо. Улуу тренер олоҕун-дьаһаҕын, саха тустууктара Олимпка ыллыктарын Саха тыйаатырын артыыстара оонньоон көрдөрүөхтэрэ. Испэктээк дьиҥ чахчы буолан ааспыт дьон олоҕун көрдөрөр буолан, артыыстартан 100% оруолга киириини эрэйэр. Саха успуордун устуоруйатыгар кыһыл көмүһүнэн суруллубут тустууктарбыт ааттарын үйэтитиигэ анаммыт туруоруу буолуоҕа.

Роман Дорофеев, Саха тыйаатырын артыыһа: "Мин Роман Дмитриев оруолун толоробун. Ол иһин олох киэн тутта сылдьабын. Урут уруккаттан Роман Дмитриев маннык киһи этэ диэн истэр этим. Мин аҕам кинини олус убаастыыр киһитэ этэ. Ол иһин олох кыра эрдэхпиттэн кини туһанан кэпсээбитэ".

Испэктээги туруоруу бу сыл саҕаланыыта толкуйдаммыта, оттон кулун тутар ыйга туруорааччы режиссер Сергей Потапов уонна испэктээк сынаарыйын суруйбут Утум Захаров  Куоркун дойдутугар Чурапчыга тахсан олорон ааспыт дьиэтигэр, олоҕун кэрэһэлиир түмэлигэр сылдьыбыта. Улуу тренер олоҕун-дьаһаҕын кырдьыктаахтык тириэрдэригэр Чурапчытааҕы архыып үлэһиттэрэ, алтыһан ааспыт чугас доҕотторо, дьиэ кэргэнэ улахан төһүү күүс буоллулар.

Владимир Винокуров, Саха тыйаатырын артыыһа: " "Андаҕар" диэн испэктээккэ Павел Пинигин оруолун толоруохтаахпын. Баар киһи оруолун толорор олус эппиэтинэстээх. Бу испэктээккэ анаан тредердэр кэлэн эччийэллэр".

Көҥүл тустуу тренера Николай Захаров икки нэдиэлэ устата артыыстары кэлэн тустууга эрчийдэ, олимпиецтар ураты приемнарын мельницаны, вертушканы уолаттар номнуо сатыыр буоллулар. Киһи ылла да оҥорбот ыарахан эбит диэн артыыстар үллэстэллэр. Дьиҥнээх тустууктар курдук ыйааһын быраҕан, дьарыгы көтүппэккэ бэлэмнэннилэр.

Артыыстарга дьиҥнээх прототиптара Павел Пинигин, Александр Иванов кэлэн тустуук киһи, олимпийскай чемпион хайдах буолуохтааҕын сүбэлээн барбыттара. Щепкин училищетыттан саҥа  буһан-хатан тахсыбыт артыыска  Александр Иванов "Тостума, инниҥ диэки баран ис" диэн сүбэ тылларын эппитэ диэн артыыс долгуйан туран үллэстэр.

Александр Захаров, Саха тыйаатырын артыыһа: "Щепкин аатынан театральнай училищены бу быйыл бүтэрэн кэллим. Кэлээппин кытта Александр Иванов оруолун биэрдилэр. Миэхэ бу бастакы улахан оруолум буолар".

Кыра Чурапчы дэриэбинэтиттэн 3 олимпиеһы иитэн таһаарбыт Улуу Куоркун испэктээгэр Пушкинскай каартанан кэлэн ыалдьыттаан ааһыахха сөп. Кини үтүө аатын билигин дойдун дьоно үрдүктүк ааттата сылдьаллар.