Килэмиэтиртэн тахса усталаах гаас ситимин уларытыахтара

Дмитрий Кузьмин хара сарсыардаттан саҕалаан күөх төлөн турбаларын иһэрдэр. Уопуттаах сварщик гаас турбаларын киирэр-тахсар, араас холбоһор сирдэрин эрдэтинэ бэлэмниир. Барыта бэлэм буолтун кэннэ дьэ сир анныгар киирэн, барытын холбоон, үлэтин биир түһүмэҕин түмүктүүр.

Дмитрий Кузьмин, сварщик: "Суол аҥар эрэ өттүн сабан турабыт. Онон сырыы үлэ тэтимин олус атахтыыр. Дьиҥэ туох да харгыс суоҕа буоллар икки төгүл түргэтиэ этибит".

Үлэлэр барыта 2017 сылтан ыытылла тураллар. Якутская уулуссаттан - Орджоникидзе болуоссатыгар тиийиэхтээхтэр. Хас сылын ахсын килэмиэтиринэн турбаны уларыталлар. Холобур, быйыл уопсайа 1 килэмиэтир 200 миэтэрэ сиргэ өрөмүөн үлэтэ барыаҕа. Мантан 550 миэтэрэтэ үрдүк күүрүүлээх гаас турбата уонна 650 миэтэрэ кыра күүрүүлээх. Билигин ыытылла турар үлэлэлэр сүрүн кыһалҕаларынан массыына сырыыта буолар. Түүннэри - күнүстэри тохтобула суох үлэлиэхтэрин чугастыы дьон олорор дьиэлэрэ бааллара хааччахтыыр.

Бэргэн Барахсанов, "Сахатранснефтегаз" АУо гаас ситимин тарҕатар салалтатын хапытаалынай тутуутун сүрүн инженерэ: "Ыйыллыбыт болдьохпутун тутуһан иһэбит. Оҥорбут сирдэрбитин тута чөлүгэр түһэрэбит. Ол курдук асфальт тэлгэтэбит, тротуардары оҥоробут".

Гаас турбата суол анныгар сытар буолан, асфаалы алдьатан, сири хаһан эргэ гаас турбаларын хостууллар. Сорох сирдэринэн асфальт халыҥа 50 сантымыатырга тиийэр. Онон тиэхиникэҕэ халыҥ суолу хаһарга ыарахаттардаах. Өссө эбиитин сир уута киирэн мэһэйдэри үөскэтэр.

Альбер Себостьянов, учаастак маастара: «Биригээдэҕэ икки сварщик, икки слесарь уонна икки тыраахтырдаахпыт уонна уу оботторор массыыналаахпыт».

Өрөмүөн үлэтэ хас биирдии дьиэҕэ күөх төлөн тохтобула уонна туох да харгыһа суох киирэригэр туһуланар. Уларытыллыбыт турба улахан кээһэниитэ суох хас эмэ сыл сытыан сөп. Уонна сүрүн гааһы туһанааччыга Дьокуускайдааҕы ТЭЦкэ үрдүк күүрүүлээх гаас турбатынан тириэрдиэхтэрэ. Оччоҕуна дьон күннээҕи олоҕо-дьаһаҕа тупсан, күөх төлөн нэһилиэнньэҕэ кэлиитин хаачыстыбата үрдүөҕэ.