Пляжка СПИД, ВИЧ, гепатит ыарыыларын бэрэбиэркэлииллэр

Дьокуускай куорат олохтооҕо София Иванова хааман иһэн анализ туттарар көһө сылдьар пуунун көрөн, бэйэтин бэрэбиэркэлэнэ сылдьар. Үйэ аҥара олорбутутун тухары ВИЧ, СПИД, гепатит ыарыыларын билэ илик. Ол эрэн сотору-сотору бэрэбиэркэлэнэр, ыарыыттан харыстанар наадалааҕын этэр.

София Иванова, Дьокуускай куорат олохтооҕо: "Туох да кыһалҕата уочарата суох туттарар олус табыгастаах эбит. Мин түөрт ыарыыга анализ биэрдим. Онтум 15 мүнүүтэнэн биллиэ диэтилэр".

Бу күннэргэ Дьокуускай куоракка ууһатар уорганнар уонна хаан нөҥүө бэриллэр ыарыылары сэрэтии, булуу акцията ыытылла турар. Аан дойду үрдүнэн саамай киэҥник тарҕаммыт СПИД, ВИЧ ыарыыны эрдэтинэ булан, эмтээһин үлэтин сөпкө бириэмэтигэр ыытар тоҕоостооҕун, нэһилиэнньэҕэ тириэрдии билиҥҥи туругунан үрүҥ халааттаах аанньааллар сүрүн соруктара буолар.

Аналиһы ылыы ыарыыта суох ааһар. Быраас түргэн-тарҕан хамсаныыннан тутатына 4 ыарыыны экспресс-тест нөҥүө быһаарар. Хаан ылыллыбытын кэннэ 15 мүнүүтэнэн анализ түмүгэ биллэр, барыта атын дьонтон кистэнэр.

Михаил Тарасов, СПИД ыарыыны сэрэтэр өрөспүүбүлүкэтээҕи киин балыыһа методист-бырааһа: "Маннык акцияны ыарыыны сэрэтэр инниттэн оҥоробут. Ити этиллибит түөрт ыарыы нэһилиэнньэ олоҕор дьайар кутталлаах социальнай ыарыыларга киирсэр. Ол иһин сэрэтэр уонна эрдэттэн ыарыыны булар сыалтан маннык тэрээһиннэри ыытабыт. Экспресс-тест олус түргэнник оҥоһуллар, ол иһин кылгас кэмҥэ элбэх киһини хабыахпытын сөп. Мин санаабар, хас биирдии киһиэхэ ВИЧ, гепатит ыарыыларга бэрэбиэркэлэнии суолталаах".

Көһө сылдьар пууҥҥа 18-тан үөһэ саастаах дьон кэлэн туттарыан сөп. Туох даҕаны докумуон ирдэммэт. Акция саҕаланыаҕыттан ыла киин куорат олохтоохторо түгэни мүлчү туппакка, кэлэн босхо анализтарын туттардылар.  Бу маннык анализ балыыһаларга аччаабыта 800 солкуобай буолар, онон тустаах акцияҕа кэлэн кыттыһаргытыгар ыҥыраллар.

Аналиһы тутар көһө сылдьар пуун киин куоракка баар 202 оройуоҥҥа дьон сөтүөлүүр сиригэр от ыйын 14 күнүгэр диэри туруоҕа. Хас күнүн ахсын сарсыарда 10 чаастан күнүс 3 чааска диэри кэлэн бэйэҕит доруобуйаҕыт туругун билиэххитин сөп.