Ойуур баһаарын умулуннарааччы биир күнүттэн

Десантниктар туһааннаах сирдэригэр түстүлэр эрэ уоту кытта охсуһууну саҕалаабытынан барыахтара. Кинилэри улахан уопуттаах Анатолий Бурмакин салайар. Ойуур баһаарын умуруорааччыга хаһан да чэпчэки сорук турбат. Бу сырыыга эмиэ эппиэтинэс улахан - ол көстөр улахан уоту уус миль диэн нэһилиэктэн  тэйитии. 

Уоту күөйэ тутууга олус кыра бириэмэ баар. Бу баһаар Уус Миль нэһилиэгиттэн 10 килэмиэтир эрэ тэйиччи. Олус түргэнник тарҕанар. Онон баһаарынайдар уоту минбалаһа эрэ кыайар диэн быһаараннар, 800 миэтэрэ усталаах сири эстэрэргэ бэлэмнииллэр.  Дэлби тэптэриини Красноярскайтан көмөҕө кэлбит Авиалесоохрана этэрээтэ оҥорор. Боруобаттары аналлаах сиргэ тардыы кэннэ анал суурадаһынынан ыстараллар. Дойду учуонайдарын саҥа арыйыытын бу сырыыга дьиннээх баһаарга холоон көрүөхтэрэ.  

Арсен Джабаров, Красноярскайдааҕы Авиалесоохрана баһаарынайа: "Учуонайдар айбыт саҥа суурадаһыннарын тургутан көрүөхпүт. Эстии кэмигэр умайар сирэ буоларыгар анаан огҥоһуллубут убаҕас".

Оччоҕо дэлби тэбии түмүгэр уоту бохсор балаһа үөсүүр. Маннык ньыма ыксал тирээтэҕинэ саамай туһалаах. Баһаарынайдар этэллэринэн,  күн суох кэмигэр умуруорар ордук. Ол иһин үлэ түүн барар. Эстэриэх иннинэ бары куттала суох сиргэ куоталларын биллэрэн сигнал ыыталлар. Дьэ ол эрэ кэннэ биир баттааһынынан 800 миэтэрэ усталаах сири дэлби тэптэрэллэр.

Уус Миль чугаһыгар баар баһаары умуруорууга Красноярскайтан кэлбит Авиалесоохрана үлэһиттэрэ, Быһыыр сулууспа аэромобильнай этэрээтэ уонна олохтоохтор үлэлииллэр. Минбалаһаны оҥорууну сэргэ сүрүн күүс лаппаахынан уонна сүгэ сылдьар уулаах рюкзагынан ыстарыынан  барар. Семен Семенов быйыл саҥа үлэлиир. Онон кини бу бастакы улахан баһаара.

Семён Cемёнов, СӨ быһыыр сулууспатын иһинэн аэромобильнай этэрээт байыаһа: "Сэттис ыйбын үлэлээн эрэбин. Үлэбит олус ыарахан. Ууну сүгэ сылдьан умулуннарабыт, лаппаахынан эмиэ туһанабыт".

Минбалаһа оҥоһуллубутун кэннэ балаһыанньаттан көрөн утары уоту ыытыы ньыматын үгүстүк тутталлар. Ол эрэн бу быһаарыныы күн - дьыл туругуттан быһаччы тутулуктаах. Мээнэ киһи кыайбат үлэтигэр баһаарынайдар сай устата бииртэн биир сиргэ көһө сылдьан уоту умуруорууга үлэлииллэр.  Былырыын тэриллбит Аэромолильнай этэрээт  41 киһилээх этэ. Онтон бу тэрилтэ көдьүүстээҕин көрдөрөн  быйыл 30 киһи эбилиннэ.

Роман Герасимов, СӨ быһыыр сулууспатын иһинэн аэромобильнай этэрээт салайааччыта: «Сүрүн сорудахпыт диэн уоту нэһилиэккэ ыыппат буолуу. Биһиги этэрээппит минбалаһалары оҥорууга үлэлэһэр. Дэлби тэптэриини сэргэ илиибитинэн хаһабыт».

Өрөспүүбүлүкэҕэ балаһыанньа син биир кытаанах. Ыксаллаах быһыы - майгы режима салҕанар.