“Айар Кут” түмсүү Нөөрүктээйи кэрэ аҥардарын сомоҕолуур

67

Айар куттаах дьахталлар түмсүүлэрэ күннэтэ тиһигин быспакка үлэтин салгыыр. Ол курдук бу күннэргэ кинилэр СВО-ҕа сылдьар уолаттарга илимтэн маскировачнай сиэккэ оҥоро сылдьаллар. Нэһилиэк бэтэрээннэрэ эрэ буолбакка, ыччат дьон эмиэ түмсэр.  Иллээх буоланнар өрөбүл күнү ахсарбакка, сайыҥҥы куйааһы билиммэккэ кэлэллэр.

 

Светлана Сивцева, Нөөрүктээйи нэһилиэгин бэтэрээннэрин салайааччыта: «Байыаннай дьайыыга сылдьар о ҕолорбутугар күүс-көмө буола сатыыбыт. Песиябытыттан 100 тыһыынча харчы хомуйан ыыппыппыт уонна Үтүө санаа холбукатын хомуйан ыыпппыппыт. Билигин сиэккэ баайа сылдьабыт онно 40 тахса киһи кытынна. Көмөҕө саастаах эрэ дьон буолбакка эдэрдэр эмиэ көхтөөхтүк кытталлар».

 

Нөөрүктээйи нэһилиэгэр Арчы дьиэтэ 2015 сыллаахха олохтоохтор көхтөөх кыттыыларынан тутуллубута. Ол иһин манна сылдьан ааспыт дьон киһи кута-сүрэ тохтуур, уоскуйар уораҕайа диэн ааттыыллар. Бу тутуллуоҕуттан кинини биир да күн иччитэх хаалларбакка «Айар кут» дьахталлар түмсүүлэрэ эдэр ийэлэр, саҥа кийииттэр, аҕа саастаах дьон - бары биир ыал курдук мустан эйэлээхтик иллэҥ кэмнэрин атаарар сирдэринэн буолла. Бэйэлэрэ бэлиэтииллэринэн бастаан кэлэн баран,тарбахха талаана суох этибит, олохпут тухары маннык айар үлэнэн дьарыктаныахпыт дии санаабат этибит диэн бэлиэтииллэр. Кэлин дьон көҕүгэр кыттыһан билигин кемус тарбахтаах иис, худуоһунньук, дизайнер бэртэрэ буолан олороллоруттан сөҕөллөр.

 

Светлана Торговкина, "Айар Кут" түмсүү чилиэнэ: «бу түмсүүбүт хамсык кэмигэр олус туһалаабыта. Ол курдук дьиэҕэ олорон араас тэрээһиннэри, дьарыктары  ыыппыппыт. »

 

Киһи сатаабата суох диэн кыргыттар бэлиэтээтилэр. Дьахталлар түмсүүлэрэ буолан, саҥа кэлбит кийииттэргэ, эдэр ийэлэргэ сандалы остуол тула олорон олоххо көрсүбүт араас уопуттарыттан үллэстэллэр. Хас биирдии саҥа кэлбит кэрэ аҥаарга үөрэбит, өйүүбүт, куруук көмө буолабыт диэн бэлиэтииллэр. Имигэс илиилээхтэр бастакы оҥоһуктара түөскэ иилинэр брошь этэ, оттон билигин туох баары барытын иистэнэллэр.

 

Мария Сидорова, "Айар Кут" түмсүү салайааччыта: «Барытыгар холонон көрөбүт. Оҕуруоттан саҕалаабыппыт, туоһунан да иистэнэн көрбүппүт. Кумааҕыттан да өрөн көрбүппүт».

 

Нэһилиэк аҕа саастаах дьонугар үтүлүк тигиитин күрэҕин тэрийбиттэрэ. Манна иистэнньэҥнэр араас тиэхиньикэни туһанан интэриэһинэй үтүлүктэри оҥорон таһаарбыттара. Кыайыылахтарга түмсүү бэйэтэ туруорбут харчытынан бириистээбитэ. Мэҥэ Хаҥалас биир улахан тэрээһининэн «Култуура» эстафетата буолар. Бу чэрчитинэн «Заозернай» түөлбэ айар түмсүүтэ саха литературатын төрүттээччи - Алексей Кулаковскай "Cүүһүн туолбут эмээхсин ырыата" айымньытынан ыйтан ордук бириэмэҕэ панно оҥорон дьон үрдүк биһирэбилин ылбыттара.

 

Түөлбэ көхтөөх, бэһиэлэй кыргыттара Арчы дьиэтигэр мустан нэһилиэк олоҕор көхтөөх кыттыылаахтар. Хайа баҕарар кыһалҕаны доҕор үтүө сүбэтинэн кыайыахха сөп диэн бэлиэтииллэр. Айар талааннарын искэ хаайбакка, норуот туһатыгар киэҥ көрдөрүүгэ таһааран илдьэ сылдьаллара олохтоохтору сөхтөрөр.