Ньурба улууһун Хаҥалас нэһилиэгэр туойунан дьарык сайдар

Олохтоох туой маастар уран илиитигэр тупсаҕай көрүҥнээх оҥоһук буолан тахсар.  "Бэйэ туойа" диэн уус кыһата үлэлээбитэ сыл аҥарыттан отто. Мастарыскыай үлэтин Лена Антонова иилиир-саҕалыыр. Кини күөс охсооччу дьоҕуругар анаан-минээн үөрэммит.  Нэһилиэккэ сонун дьарык тэриллиитигэр Сунтаар Кэмпэндээйититтэн анаан-минээн туой аҕалыллыбыт. Бу кэм иһигэр күөс охсооччулар олохтоох матырыйаалы кытта үлэлэһии ымпыгын-чымпыгын үөрэттилэр. Итиэннэ бэйэбит киэнэ кытаанах, ол эрэн имигэс, иһит оҥорорго ордук табыгастаах эбит диэн санааҕа кэлбиттэр. Онон хас биирдии оҥоһук төрөөбүт дойду сылаас тыынын иҥэринэр.

"Кэмпэндээйи туойа сымнаҕас уонна кыра температураҕа буһар. Улахаҥҥа буһардахха хайа барар. Бороубалаан көрөбүт, глазуру эмиэ", - диир "Бэйэ туойа" уус кыһатын күөс охсооччута Лена Антонова.

Олохтоох туой биир сүрүн уратыта глазурь диэн, килбэчитии  холкутук оҥоһуллар. "Бэйэ туойдара" иһити хатарыыга үүтү туһанар төрүт ньыманы тутталлар. Дьиэ салгыныгар туран куура быһыытыйбыт, оһуордаммыт оҥоһугу үрүҥ илгэҕэ уган ылан баран буһараллар. Оччотугар, олус тупсаҕай мас дьүһүннээх оҥоһуктар тахсаллар. Маны таһынан, үүт сыата-арыыта  бүөлээн, аһыырга сөптөөх иһит буолар. Онон төһө баҕар аһыыр иһити оҥорор кыах баар.

"Бэйэ туойа" мастарыскыай нэһилиэк иһинэн үлэлиир "Алгыс" дьахталлар түмсүүлэрин көҕүлээһининэн тэриллибит. Хаҥалас сириттэн-уотуттан булуллубут туой иһит эмтэркэйдэрэ, өбүгэ төрүт дьарыгын сөргүтүүгэ төрүөт буолбуттар. Нэһилиэк дьахталларын сөптөөх сынньалаҥын, дьарыктаах буолуутун тэрийэр инниттэн туһааннаах бырайыак суруллан, граннарга кыттан, наадалаах оборудование толору ылллыллыбыт.  Ким баҕалаах кэлэн иллэҥ кэмин атаарар, туой алыптаах дьарыгар ылларар.

""Год народных инициатив” диэҥҥэ Дьахталлар кэмитиэттэрэ уонна “Хомус”  кэммиэрчискэйэ суох тэрилтэ  кыттан, 400 тахса тыһыынчаны ылбыппыт. Онон 4 круугу уонна буһарар оһоҕу ылан турабыт. Билигин ким баҕалаах үөрэнэр, үлэлиир, олус үчүгэй салаа буолла", - диэн "Алгыс" дьахталлар түмсүүлэрин кыттыылааҕа  Александра Васильева иһитиннэрдэ.

Өбүгэ саҕаттан кэлбит төрүт дьарыгы, сайыҥҥы кэмҥэ ыччат дьон ылсаллар. Үөрэх кэннэ дьарыкка сылдьыбыт кыргыттар номнуо, оһуордааһын курдук уустук үлэни оҥороллор. Онтон түмэл уонна олохтоох оскуола холбоһуктаах сайыҥҥы кыраайы үөрэтэр лааҕырыгар сылдьар уолаттар туойу таҥастааһынтан саҕалаан, иһит оҥоһуллуутун кэрдииһин барытын билсиэхтэрэ. Бастакы хардыы үлтүрүтүү, мэһийии, онтон сыыйа оҥоһук оҥорууга холонуохтара. 

Бу оҕолор бары былыырыын Кэмпэндээйиттэн туой аҕалыытыгар сылдьыспыттара. Онон туой хайдах сиргэ баар буоларын, хайдах көрүҥнээҕин билбит буоланнар, быйыл бэйэлэрин нэһилиэктэрин сириттэн көрдүүргэ бэлэмнэр уонна эрэллээхтэр. 

"Лааҕырга быйылгы сыалбыт-сорукпут диэн, чугастааҕы нэһилиэктэринэн, сирдэринэн туой көрдөөһүнэ, экспедиция буолуохтаах. Уонна кыраайы үөрэтэн, нэһилиэкпит историятын эмиэ санатан экспедицияларга сылдьыахатара", - диэн  кыраайы үөрэтэр лааҕыр үлэһитэ Галина Антонова кэпсиир.

"Бэйэ туойа" мастарыскыай төрүт ньыманы олохтоохтор сынньалаҥанарын уонна дьарыктаах буолууларын кытта дьүөрэлиир. Инниктин дохуот киллэрэр салаа быһыытынан сайыннарар былааннаахтар. Онон бу кыракый балаҕан иһигэр оҥоһуллан тахсар уран оҥоһуктар, инниктин саха сирин атыы-эргиэн эйэтин хаҥатыахтара.