Өрөспүүбүлүкэтээҕи "Сир уустара" лааҕыр 3 сылын үлэлиир

"Сир уустара" өрөспүүбүлүкэтээҕи үөрэтэр-чэбдигирдэр кииҥҥэ сарсыардааҥҥы эмтэнии. Манна оҕолор дойду санаторийдарын ирдэбилинэн чэбдигирэллэр, итиэннэ Кэпмэндээйи ураты айылҕата биэрэр минералларынан доруобуйаларын көннөрүнэллэр. Бу хос нэһилиэккэ хостонор туустан сыбанан оҥоһуллубут. Тыынар уорганнары эмтээһиҥҥэ уонна иммунитеты бөҕөргөтүүгэ ордук туһалаах.   

"Туустаах хос диэн барыта Кэмпэндээйи тууһунан сыбанан оҥоһулулбут. Анал аппараат көмөтүнэн салгыҥҥа ионнар тахсаллар.  Уонна оҕолор тыыналларыгар үчүгэйдик дьайар. Биһиги туустаах хоспут таһынан, айылҕабыт барыта бэс чагда. Салгыммытыгар туус баар, олоччу эмтээх диэххэ сөп", - диэн "Сир уустара" өрөспүүбүлүкэтээҕи үөрэтэр-чэбдигирдэр киин аҕа сиэстэрэтэ Юлия Фокина кэпсээтэ.

Уопсайынан, Кэмпэндээйи ураты, дьикти айылҕалаах сир. Манна 4 туустаах күөл, 3 таас туустаах хайа баар. Олортон саамай аатыраллара Мохсоҕоллоох күөлэ.  2 килэмиэтир усталаах уһун синньигэс күөл түгэҕин бадараанынан үгүс ыарыы эмтэнэр. Онтон күөл уутун күөмэй ыарыытын сэрэтиигэ туһаналлар. Биир күнү көтүппэккэ, лааҕыр оҕолоро күннэрин эмтээх уунан сайҕаныыттан саҕалыыллар. Киин эмчиттэрэ этэллэринэн, ыарыыны эрдэттэн сэрэттэххэ, оҕо кыһын ыалдьыбат.

Киин сылы эргиччи үлэлиир. Кыһыҥҥы өттүгэр симиэнэ 14 хонуктаахтаах, онтон сайын 21 күн. Манна Өрөспүүбүлүкэ араас муннуктарыттан оҕолор кэлэн сынньаналлар. Доруобуйаны чэбдигирдиини таһынан, иитиллээччилэр научнай-чинчийэр үлэнэн дьарыктаналлар, билиилэрин хаҥаталлар. Ол курдук естественно-научнай, политехническай, туризм-кыраайы үөрэтии уонна креативнай айымньы хайысхалара бааллар. Хас биирдии симиэнэ бэйэ бэйэтигэр маарыннаспат атын бырагырааммалаах. Холобура, бу сырыыга Тойбохойдооҕу музейы кытта ыкса үлэлэһэн, кыраайы үөрэтии хайысхатыгар ордук болҕомто ууруллар.

"Үөрэҕирии чаһыгар сайыҥҥы өттүгэр Тойбохой музейын кытта эбии үлэлэһэбит. Онтон эбии үөрэхтээһин педагогтара кэлэллэр. Олор араас уруоктары, куруһуоктары ыыталлар. Холобур, маһынан ууһаныы, ландшафнай дизайн, үүнээйи олордуу, уруһуй, ырыа", - диир  "Сир уустара" өрөспүүбүлүкэтээҕи үөрэтэр-чэбдигирдэр киин уһуйааччыта Гульнара Степанова.

Манна "Успех каждого ребенка" диэн анал национальнай быргырааммаҕа олоҕуран сынньалаҥ тэриллэр.  Бары усулуобуйа олохтоммут. Симиэнэ устата оҕолор этэрээттэргэ хайдыһан айымньылаахтык дьарыктаналлар. Хамаандаҕа үлэлииргэ, бэйэ бэйэни өйөөһүн курдук хаачыстыбалары сайыннараллар. Оҕолор саҥа доҕоттордонон үөрэн-көтөн төннөллөр.

"Үчүгэй, сарсыарда ахсын сэрээккэлиибит, хаһан баҕар суунабыт. Балыаһаҕа киирэн процедуралары ааһабыт. Сарсыардааҥҥы аһылыкка барабыт, онтон салҕыы актовай саалаҕа этэрээппитин кытта дьарыгырабыт", - диэн "Сир уустара" өрөспүүбүлүкэтээҕи үөрэтэр-чэбдигирдэр киин иитиллээччитэ Дуолан Егоров этэр.

Киин сылы эргиччи үлэлиир, манна оҕолор эрдэттэн суруттарыы быһыытынан кэлэллэр. Туох да ураты сүүмэрдээһин суох. Өрөспүүбүлүкэ хайа баҕар улууһуттан 1-11 кылааска диэри үөрэнээччилэр сылдьар кыахтаахтар.