Өҥүрүк куйааска быраастар сүбэлэрэ уонна күн-дьыл туругун билгэтэ

Бүтүн саха сирин үрдүнэн куйаас күннэр тураннар, хас биирдии киһи күн сардаҥаларыттан харыстанар, күлүк сири былдьаһар. Киин куорат олохтооҕо Антонина Пашкова бэйэтэ эмиэ итииттэн харыстанар ньымалаах.

"Күҥҥэ элбэхтэ уунан сайҕанабын, сирэйбин, сүүспүн, илиибин-атахпын", - диир Дьокуускай куорат олохтооҕо Антонина Пашкова.

30 тахса кыраадыс итиилэр бу нэдиэлэ устата эмиэ салҕаныахтара. Арай кыра-кыралаан сорох сирдэринэн ардахтыан сөп. Ол эрэн, салгын температурата улаханнык сөрүүкүйүө суоҕа. Өрөбүл күн киин улуустарга этиҥнээх ардах түһэрэ күүтүллэр диэн күнү-дьылы кэтээн көрөөччүлэр билгэлииллэр.

"Бу күннэргэ киин уонна илин эҥэр улуустар үрдүлэринэн улаханнык хамсаабат антициклон кэлэн, куйаас күннэр үүннүлэр. Онон бу нэдиэлэҕэ уонна өрөбүллэргэ 35-38 кыраадыска тиийэ куйаас буолуоҕа. Өрөспүүбүлүкэүрдүнэн салгын температурата түүн 12-17, күнүс 25-30. Ардах түһэр кэмигэр 19-24. Киин, илиҥ уонна соҕуруулуу-илиҥ улуустарга салгын температурата түүн 15-20 , күнүс 30-35 кыраадыс", - диэн Дьокуускайдааҕы гидро-метеорологистическай киин күнү-дьылы кэтээн көрөр салаатын салайааччы Саргылана Никитина иһитиннэрдэ.

Дьон итииттэн быыһанаары, сөрүүкээри бары ньыманы барытын туһанар. Кимнээх эрэ күнтэн хаххаланан зонтиктаах, ким эрэ анал сапсынар маллаах сылдьар. Онтон ордук итииргээбиттэр аара хааман иһэн фонтаннарга чаламааттаналлар, кимнээх эрэ үрэхтэргэ, күөллэргэ сөтүөлүүллэр. Ол эрэн, Саха сирин үрдүнэн биир даҕаны киһиэхэ кутталы үөскэппэт анал сөтүөлүүр сир суох. Киин куорат 202 оройуонугар баар пляж анал экспертизаны ааһа илик, ол диэбэккэ дьон син биир итииттэн быыһанаары сөтүөлүүргэ күһэллэр. Аҥардас сыл саҕаланыаҕыттан 19 киһи ууга былдьанна.

"Өрөспүүбүлүкэ үрдүнэн билигин куйаас күн турар буолан, дьон сөрүүкээри уу эбийиэктэригэр, арыыларга сынньана тахсаллар. Сылын аайы ыытыллар ууга былдьаныы анаалыһа көрдөрүүтүнэн, сүрүн тимирии төрүөтүнэн буолаллар – көҥүллэммэт миэстэлэргэ сөтүөлээһин, итирик туруктаах ууга киирии уонна оҕолору көрүүтэ-истиитэ суох хаалларыы. Дьон ууттан сэрэхтээх буолалларын туһугар ГИМС инспиэктэрдэрэ холбоһуктаах рейдэлэри ыыталлар", - диэн  СӨ ЫБММ пресс-сулууспатын аҕа инспиэктэрэ Зинаида Дьяконова сырдатта.

Ааспыт сылы кытта тэҥнээн көрдөххө, быйыл баччаларга 20 киһи ууга түһэн өлбүт. Хомолтолоох статистика уларыйбат. Инспектордар алын кээмэйдээх суудуналары эмиэ бэрэбиэркэлииллэр, уу эбийиэктэригэр куттал суох буолуутун хааччыйаллар.

Онтон итииттэн хайдах быыһанарбытын, күнтэн төбөбүт ыарыйдаҕына,  итииргээн турукпут мөлтөөтөҕүнэ хайдах буоларбытын, тугу гынарбытын тустаах исписэлиистэр маннык быһаараллар.

"11 чаастан 17 чааска диэри күннээх сиргэ, аһаҕас халлаан анныгар сылдьыман. Ханна эмит айанныыр буоллаххытына, бытыыккалаах уугутун илдьэ сылдьын. Маннык итиигэ киһи күн ахсын 2 - 2,5 лиитирэ ууну иһиэхтээх. Минеральнай гааһа суох ууну, күөх чэйи, морс иһиэххэ сөп. Улахан саахара суох буолун наада. Уонна таҥаскыт ыга туппат, холку буолуохтаах", - диэн Дьокуускай куорат 1-кы №-дээх поликлиникатын, сэрэтэр үлэҕэ салаатын сэбиэдиссэйэ  Ефросинья Дьячковская сүбэлээтэ.

Саха сирин үрдүнэн күн-бүгүн, биир даҕаны анал сөтүөлүүр сирдэр арылла иликтэр. Сыллата үөскүүр кыһалҕаны быһаарар кэм болдьосто, дьон куттала суох сынньаналларын тэрийии уолдьаста диэн олохтоохтор санааларын үллэстэллэр.