Эһиил Олоҥхо ыһыаҕа Амма улууһугар тэриллиэҕэ

Өймөкөөн улууһун Томторугар 16-с өрөспүүбүлүкэтээҕи Олоҥхо ыһыаҕа түмүктэннэ. Манна Россия, Өрөспүүбүлүкэ куораттарыттан, улуустартан биэс тыһыынчаттан тахса киһи сырытта, тэрээһиннэргэ кытынна. 200 тахса киһи олоҥхолоото. Ыһыах түһүлгэлэригэр 80 тахса тэрээһин ыытылынна — «Дугуйа Бөҕө» испэктээк-олоҥхо премьерата, олоҥхону ааҕыы марафона, уустар куонкурустара, оһуохайдьыттар туойсуулара, ат сэбэ-сэбиргэлэ көрдөрүлүннэ, спорт национальнай көрүҥнэрэ уонна да атыттар.

“Биһигини кытта бүгүн баар манна Дугуйдаан Винокуров. Кини Өймөкөөн хайатыттан, Дойдубут тэбэр сүрэҕэр Москваҕа диэри саха сылгытынан тиийэн, Өймөкөөнүн, Саха сирин барытын аатырдан турар. Биир дойдулаахпыт Евгений Кривошапкин, сахалартан бастакынан Аан дойду саамай үрдүк чыпчаалыгар Эверест хайаҕа тахсан, СӨ былааҕын тиэрдэн, биһигини үөрдэн-көтүтэн, эмиэ Саха сирин аатырдыбыт биир киһибит буолар. Мин олуһун үөрэбин уонна киэн туттабын, Сахабыт сирин ханнык баҕарар улууһугар маннык дьоннордоохпутуттан. Ол аата биһиги сарсыҥҥылаахпыт, иннибит диэки барабыт”, - диэн Өрөспүүбүлүкэ Ил Дархана Айсен Николаев иһитиннэрдэ.

Ыһыах түмүктүүр чааһыгар Өймөкөөн улууһун баһылыгын э.т. Александр Иванов Ытык Дуоҕаны Амма улууһун баһылыгар Степан Кузьмиҥҥа туттарда. Онон эһиил Олоҥхо ыһыаҕа Аммаҕа тэриллиэҕэ.