Ил Дархан уонна Дьокуускай баһылыга тутуулары көрдүлэр

Ил Дархан аан бастаан Дьокуускай куорат 26-с нүөмэрдээх оскуолатын өрөмүөнүн, эбии  тутуу үлэтин көрүүтүттэн саҕалаата. Бу оскуолаҕа быйылгы сылтан 4,5 тыһыынча кэриҥэ иэннээх, 3 мэндиэмэннээх сыһыары дьиэ тутуутун саҕалаабыттара. Манна эбии 315 миэстэ тахсан киин куоракка турар сытыы кыһалҕаны арыый да чэпчэтиэн сөп. Билигин баар дьиэлэригэр 1900 оҕо икки симиэнэнэн үөрэнэллэр.

Евгений Григорьев, Дьокуускай куорат баһылыга: «Куорат киинигэр баар оскуола кэҥиирэ олус үөрүүлээх. Сыһыары тутууну сэргэ оскуола хапытаалынай өрөмүөнэ бара турар. Өрөмүөн балаҕан ыйын 1 күнүгэр түмүктэниэ, онтон тутуу сыл бүтүүтэ бүтүө. Итиэннэ национальнай бырайыак чэрчитинэн тута олоххо киирэн үлэлиэҕэ».

Эбии тутуу үлэҕэ киирдэҕинэ оҕолор саҥа спорт саалатыгар эрчиллиэхтэрэ уонна саҥардыллыбыт остолобуойга аһыахтара. Саҥа дьиэҕэ 8, 9, 10 уонна 11-с кылаас оҕолоро үөрэниэхтэрэ. Итиэннэ аныгы хааччыллыылаах быраас хоһо баар буолуоҕа.

Салгыы Ил Дархан киин куорат уулуссаларын өрөмүөнүн билистэ. Билигин сүрүн үлэлэр Поярков уулуссатыгар ыытыллаллар. Манна 25 тыһыынча квадратнай миэтэрэ саҥа асфальты тэлгиэхтэрэ уонна 9 тыһыынча квадратнай миэтэрэ дьон хаамар тротуардарын оҥоруохтара.

Евгений Григорьев, Дьокуускай куорат баһылыга: «Быйыл биһиги хаһааҥҥытааҕар да эрдэ асфальт ууран саҕалаатыбыт. Инньэ гынан ыам ыйыгар асфальт бастакы дьапталҕатын уурбуппут».

Быйыл киин куоракка 30-ча километр суолу өрөмүөннүөхтэрэ. Бу сылга уопсайа «Куттала суох уонна хаачыстыбылаах суоллар» федеральнай бырайыак чэрчитинэн 2,3 миллиард солкуобай көрүллүбүт мантан 560 мөлүйүөнэ Дьокуускай куорат үбүттэн, онтон ордуга өрөспүүбүлүкэ уонна дойду бүддьүөтүттэн тыырыллыбыт.

«Уһук Илиҥҥи уокурукка 1000 олбуор» бырагыраамма быйыл эмиэ тэтимнээхтик ыытыллар. Бу сылга киин куоракка уопсайа 38 саҥа олбуору тутуохтара. Манна саҥа сүүрээн диэн олохтоохтор бэйэлэрэ олбуордарын бырайыактааһыҥҥа кыттыһан, бэдэрээччити уонна куорат салалтатын кытары ыкса үлэлэһэн, олорор эйгэлэрин тупсараллар. Лермонтов уулуссатын 60-с №-дээх дьиэтин старостата Леонид Пахомов тэлгэһэлэрин өрөмүөнэ саҕаланыаҕыттан, бэдэрээччит хас биирдии хамсаныытын кэтээн көрөр, өр сыллар тухары буолбатах өрөмүөн үлэтин үрдүк хаачыстыбылаахтык оҥотторор баҕалаах.

Леонид Пахомов, Лермонтов уулуссатын 60 №-дээх дьиэтин старостата: “Олбуор тупсарыытын олохтоохтор былырыыҥҥаттан туруорсубуппут. Онтубут быйыл хата ааста. Үлэ бара турар. Аны ол үлэни биһиги хонтуруоллуохтаахпыт. Итэҕэс-быһаҕас син биир баар. Ону тута көннөттөрөбүт. Тутааччылар биһиэхэ утары бараллар, этиилэрбитин ылыналлар”.

Бу олбуорга массыына турар сирдэрэ улаатан, оҕо оонньуур, спордунан дьарыктанар сирдэрэ оҥоһуллуохтара. Барыта аныгы кэм ирдэбилигэр эппиэттиир, үрдүк хаачыстыбылаах матырыйаалларынан оҥоһуллуоҕа диэн бэдэрээччит мэктиэлиир.

Алгыс Каратаев, бэдэрээччит: “Быйыл олбуору тупсарыыга 5 судаарыстыбаннай хантараагы баттастыбыт. Онтон биирдэстэрэ Лермонтов уулуссатын 60 №-дээх дьиэтэ. Манна тротуар оҥоруохтаахпыт уонна былаһаакканы асфальтыахпыт. Эргэни барытын көтүрэн, массыына туруорар сирин кэҥэттибит. Оҕо оонньуур былаһаакката барыта саҥалыы оҥоһуллуохтаах”.

Саҥа олбуору былаан быһыытынан киин куорат салалтата туттаран, үлэҕэ киллэрэн баран олохтоохтор бас билиилэригэр биэрэр. Оччоҕуна нэһилиэнньэ салайар хампаанньа нөҥүө көҕөрдүү үлэтин, саҥа былаһааккаҕа ырааһы тутууну хааччыйыахтаах.