Иэстээхтэри араараллар

Гаас үлэһиттэрэ дьиэлэри кэрийэн дьон олбуорун тонсуйаллар. Өр кэмнээх кэтэһии манаһыы түмүгэр ким да ааны кэлэн арыйбата. Бу мээнэ дьон дьиэтэ буолбатах. Күөх төлөнүнэн туһанан баран сөпкө бириэмэтигэр төлөөбөтөх, эбэтэр олох да төлөбүртэн аккаастаммыт дьон дьиэлэрэ. "Сахатранснефтегаз" тэрилтэ соторутааҕыта иэстээх дьоҥҥо барыларыгар иһитиннэрии суругу ыыталаабыт да, иэстээх дьон ахсаана аччаабат. Онон дьиэлэри кэрийэргэ күһэллэллэр.

Елена Копырина, Сахатранснефтегаз "тэрилтэ чааһынай дьону кытары үлэлиир салаатын салайааччытын солбуйааччы: "Иэстээхтэри кытта Бырабыыталыстыба ууурааҕынан үлэлиибит. Бастаан иһитиннэрии ыытабыт. Онтон иэс кээмэйэ улахан буоллаҕына бытарытан төлүүрүгэр сөбүлэҥ түһэрсэбит. Олох төлөөбөт абоненнарга саамай кытаанах миэрэбитигэр тиийэбит".

Олох төлөөбөт күөх төлөнүнэн туһанааччылары гаас ситимиттэн араараллар. Сахабыт сирин олохтоохторун иэһэ күн-түүн элбээн иһэр, билиҥҥи туругунан 90-тан тахса мөлүйүөн солкуобай иэс баар. Мантан улахан аҥарын киин куорат олохтоохторо. Онон сүрүн болҕомто Дьокуускай куоракка ууруллар. Хаста да төлөбүрү оҥоруу наадалааҕын сэрэтии кэннэ гаас үлэһиттэрэ дьиэлэри кэрийэ бараллар.

Антип Лугинов, "Сахатранснефтегаз" тэрилтэ гаас ситимин тарҕатар салаатын маастара: "Иэстэрин төлөөбөт дьону гаас ситимэ сир аннытан тахсар сиринэн тимир бүөлэри туруортаатыбыт. Бүгүҥҥү күҥҥэ тэрилтэ иннигэр 93 мөлүйүөн солкуобай иэс баар. Онтон техническэй көрүү-харайыы өттөгэр 50-чэкэ мөлүйүөн".

Дьиҥэ төлөбүрү оҥоруу судургу, хас да ньыманан төлүөххэ сөп. Ол эрэн үгүс иэстээх дьон үп-харчы өттүнэн кэккэ ыарахаттары көрсөр буоланнар сөпкө бириэмэтигэр төлөөбөттөр. Инньэ гынан кыра-кыралаан мунньуллан ботуччу суумма тахсар.

Елена Копырина, Сахатранснефтегаз" тэрилтэ чааһынай дьону кытары үлэлиир салаатын салайааччытын солбуйааччы: "Быйылгаттан собильнай сыһыарыы баар буолла. Манна киирэн абонент ыйдааҕы төлөбүрүн оҥоруон, усчуоччугун көрдөрүүтүн суруйан хааларыан сөп".

Кулун тутар ыйга тахсыбыт саҥа федеральнай сокуоҥҥа олоҕуран, күөх төлөн ситимнэрин көрүүнү-истиини гаас ситимин тарҕатар тэрилтэлэр эрэ оҥорор кыахтаахтар диэн сокуон аны балаҕан ыйыттан саҕалаан үлэлиэҕэ. Оччоҕуна иэстээх дьоҥҥо бу өҥөнөн туһаныыга эмиэ ыарахаттардаах буолуоҕа.