Ураты дьоҕурдаах дьон сатабылларын дьоҥҥо-сэргэҕэ тиэрдэллэр

Талах мастан эгэлгэ араас оҥоһуктар. Александр Дмитриевич Апросимов талаҕынан өрүү абылаҥар ылларбыта 20 тахса сыл буолла. Уран тарбахтаах корзинаттан саҕалаан, чорооҥҥо тиийэ араас оҥоһуктары оҥорор. Оннооҕор, кэнники  миэбэлгэ тиийэ оҥорор буолбут. 20 сыл уопуттаах киһи номнуо, үүнэн эрэр көлүөнэни умсугутуулаах дьарыкка угуйар.

"Билигин доруобуйаларынан хааччахтаах дьону реабилитациялыыр интернат- техникум оҕолорун талаҕынан корзина баайарга үөрэтэбин. Бу талахпытын 202 дьоҕус оройуон күөх хонуутуттан, эбэтэр биэрэктэн хайдах түбэһэринэн, сирбин-уоппун аһатан, онтон хомуйан аҕалабын", - диир талаҕынан өрүүгэ маастар Александр Апросимов.

Талаҕынан өрүү бэйэтэ туспа искусство. Манна илииҥ сымсатын таһынан, күүстээх буолара эрэйиллэр. Эрийэ тутарга мас кытаанах, онон күүс-уох наада. Өссө сэрэнэн үлэлиигин, тоһутан кэбиһэр куттал эмиэ баар. Александр Дмитриевич биһиги устар бөлөххө кылгас да буоллар маастар кылаас көрдөрдө, оҥоһук бөҕө-таҕа буоларыгар анаан ханнык ньыманы туһанар кистэлэҥин арыйда:

"Талаҕынан ыарахан, боростуой диэбэппин. Ол гынан баран, хаачыстыбалаах. Холобур, сорох корзиналарым тыраахтар, массыына анныгар алҕас киирэн биэрэллэр. Оннук түгэн хас да төгүл буолбута. Ону көннөрөн биһэҕин, олус бөҕө. Лаахтыахха да, лаахтаамыахха да сөп. Лаах пуорматын тутар, оччоҕо сахсаннаабат, бөҕө-таҕа буолар".

Оттон Нина Петровна Корнилова кылтан-сиэлтэн үчүгэйкээн бэйэлээх сэлээппэлэри, киэргэллэри оҥорор. Бу эмиэ туспа талаан. Маастар номнуо 10 тахса сыл кылынан дьарыктанар. Билигин бэйэтэ өрөрүн таһынан, дьону эмиэ үөрэтэр. Ордук аҕам саастаахтарга маастар кылаастары ыытабын диир:

"Бэйэм оройуоммар үһүс көлүөнэ оскуолатыгар кыл, сиэл үөрэҕин ыытабын. Биэнсийэлээхтэргэ, бары дьиэҕэ олорор далбар хотуттарга. Уонна куоракка, оройуоммут иһигэр куруутун быыстапкаларга кыттабын".

Өр-өтөр буолбакка Нина Петровнаҕа үөрэниэн баҕалаахтар тула муһуннулар. Уран тарбахтаах тутатына маастар кылаас оҥордо.

Дьокуускай олохтооҕо Татьяна Афанасьевна Семенова анаан-минээн кылтан-сиэлтэн өрөргө үөрэнэ кэлбит. Аҕыйах мүнүүтэ иһигэр өрөр ньыманы билистэ:

"Миэхэ сиэллээхпин, ол иһин үөрэнэ сатыыбын баайарга. Кини сэлээппэтин сөбүлээтим, олус үчүгэйдик баайбыт. Чуолаан, кугас өҥнөөх дьахтар сэлээппэтин".

Ураты дьоҕурдаах дьон бэйэ сатабылларын дьоҥҥо тиэрдэллэрэ кэрэхсэбиллээх суол. Манна даҕатан эттэххэ, норуот маастардара төһө кыалларынан дьоҥҥо-сэргэҕэ маастар кылаастары ыыталлар. Онон сыллата маастардар кэккэлэрэ хаҥыыр. Ол курдук, Саха сиригэр бу сыл саҥатыгар бэлиэтэммитинэн, 275 киһи СӨ норуотун маастара, 606 киһи СӨ норуот уус-уран оҥоһуктарын маастара үрдүк ааты сүгэллэр. Оттон бэрт соторутааҕыта, Ил Дархан сыллата 7 норуот маастарыгар истипиэндьийэ олохтуур туһунан дьаһала таҕыста.