Сыл саҕаланыаҕыттан үлэтэ суох киһи ахсаана аҕыйыыр

36

"Моя работа" Дьокуускай нэһилиэнньэтин дьарыктаах буолууга киинигэр күннэтэ ортотунан 40 киһи сылдьар. Ким үлэ миэстэтин ыйыталаһар, ким учуокка тураары, ким докумуон аҕалар, ким справка ыла кэлэр. Билигин сайыҥҥы кэмҥэ быстах үлэ миэстэтин ыйыталаһааччы элбэх. Ол курдук, сокуоннай саастарын ситэ илик оҕолору сайыҥҥы сынньалаҥнарын кэмигэр үлэ  миэстэтинэн хааччыйыыга үлэ барбыта, ол эрээри вакансия бу хайысхаҕа аҕыйах. Дьокуускай куорат 2 нүөмэрдээх оскуолатын 9 кылааһын быйыл бүтэрбит Лилия Никифорова оскуолатын иһинэн баар "Спутник" лааҕырга үлэлээри Кииҥҥэ докумуоннарын аҕалбыт.

 

Үлэ миэстэтин туһунан этэр эбит буоллахха, Өрөспүүбүлүкэ үрдүнэн бүгүҥҥү туругунан, 12 тыһыынчаттан тахса үлэ миэстэтэ баар. Улахан аҥара  рабочай идэлэргэ, ол курдук суоппардарга, тутуу маасатрадарыгар, силиэсэрдэргэ, электромонтердарга, сыбаарсыктарга, анал техникэ машинистарыгар  ордук наадыйаллар уонна да атыттарга. Оттон хаалбыт специэлиистэргэ  Дьокуускайга эмиэ сүрүннээн, рабочай идэлэргэ үлэ миэстэтэ элбэх.

 

“Аһаҕас үлэ миэстэлэрин этэр эбит буоллаххына, билигин биһиги баазабытыгар уопсайа 1494 аһаҕас үлэ миэстэтэ баар. Мантан ордук сулууспалаах үлэһиттэргэ ирдэниллэр, ол курдук араас менеджердэр, инженердэр, исписсэлиистэр уонна бухгалтердар, медицинэ сиэстирэлэрэ. Онтон рабочай идэлэри ылан көрдөххө, ордук суоппардар ирдэнэллэр, манна саамай элбэҕэ автобус үлэһиттэригэр наадыйаллар. Ону таһынан, суол оҥорооччулар, грузчиктар, повардар уо.д.а.”, - диир Дьокуускай куорат  нэһилиэнньэтин дьарыктаах буолууга киинин салайааччы Мария Слепцова.

 

Оттон үлэтэ суох киһи ахсаана бу кэнники уустук 3 сылы кытта тэҥнээтэххэ, балачча аҕыйаата. Билигин үлэтэ суох буолуу көрдөрүүтэ 0.5 бырыһыанынан аҕыйаан, уопсай үлэ күүһүгэр 5,8 бырыһыаны ылар. Сыл саҕаланыаҕыттан, үлэһит ахсаанын аҕыйатыыга 193 киһи хабылынна. 

 

Маныаха дьону үлэ миэстэтинэн хааччыйыыга кэккэ тэрээһиннэр ыытыллаллар. Кэлэр нэдиэлэҕэ, бэс ыйын 23 күнүгэр, Саха сиригэр үлэ дьаарбаҥкатын бүтүн Россиятааҕы 2 түһүмэҕэ ыытыллыаҕа. Бастакы түһүмэх муус устар ыйга буолбута. Дьаарбаҥкаҕа нэһилиэнньэ араас араҥата барыта кыттар кыахтаах.

 

“Манна 60 тахса үлэни биэрээччи кыттыыны ылыаҕа, ону таһынан 3  үрдүк уонна 19 орто үөрэх эмиэ ханнык үөрэхтэри арыйалларын кэпсиэхтэрэ, консультациялыахтара”, - диэн салҕыы Дьокуускай куорат  нэһилиэнньэтин дьарыктаах буолууга киинин салайааччы Мария Слепцова сырдатта.

 

Тэрээһиҥҥэ улахан бырамыысылыннай, бүддьүөт тэрилтэлэртэн саҕалаан, чааһынай хампаанньалар кыттыахтара.