Хаҥаласка "Уран-уус кыһата" диэн саҥа сурунаал сүрэхтэннэ

Саха таҥаһын, оҥоһуктарын эгэлгэтэ. Бу барыта "Уус-уран кыһата" диэн саҥа сурунаалга киирдэ. Хаҥалас улууһун норуот маастара Матрена Даниловна Ильина бэйэтэ өр кэм бибилэтиэкэҕэ үлэлээбитэ, билигин таҥалайдыы тигиигэ маастар кылаастары оҥорор, бэйэтэ тикпит сахалыы таҥастарынан быыстапкаларга кыттар, быыстапка тэрийэр. Сурунаал сүрэхтэниитин үөрүүлээх күнүгэр кини оҥоһуктарын эмиэ көрдөрүүгэ туруордулар.

"Улуус иистэнньэннэрин, уустарын, ювелирдарын, бары сатыыр дьонун кини маннык таһаардаҕына, сахалыы этиллэрин курдук, суруллубут суоруллубат. Онон бу сурунаалга киирэн хааллахтарына, бэйэлэригэр да астык уонна дьон көрөн үөрэнэригэр туһалаах дии саныыбын", - диир норуот маастара Матрена Ильина.

Хаҥаластааҕы кииннэммит бибилэтиэкэ ситимэ "Култуура" бырайыакка  хапсан, аныгы үйэ ирдэбилигэр бары өттүнэн эппиэттиир бибилэтиэкэ буолар. Ол курдук, улуус бибилэтиэкэтэ үчүгэй материальнай-тэхиничэскэй баазаланан, кинигэ пуондата кэҥээн, элбэх ааҕааччы интэриниэт ситимигэр киирэр кыахтанан, үлэ саҥа хайысхатын киллэрэн ааҕааччыга чугас уонна наадалаах. Оттон үлэһиттэр сыллата араас ураты бырайыактары толкуйдаан олоххо киллэрэллэр. Бу саҥа сурунаалы Саргылана Курчатова уонна Максим Петров оҥорон таһаардылар. Бастакы нүөмэргэ Матрена Даниловна Ильина «Таҥалайдыы тигии» быысапкаҕа маастар-кылааһа уонна кини тикпит таҥастара, араас таһымнаах быыстапкаҕа кыттыбыт үлэлэрэ киирдилэр.

“Бибилэтиэкэ үлэһиттэрэ билиини тарҕатар аналлаах буоламмыт, бу Уран- уус кыһата диэн сиэрийэбитин киэн араҥаҕа, дьоҥҥо саҥа дьарыгы баһылыылларыгар, билиини бэйэлэригэр иҥэринэллэригэр үлэбитин салҕыахпыт”, - диэн Хаҥаластааҕы киин библиотека үлэһитэ, бырайыак ааптара Саргылаана Курчатова этэр.

Сурунаалы таһынан, бибилэтиэкэ ютуб-ханаалыгар маастар-кылаас видеота таҕыста. Ону ааҕааччы сурунаал кэннигэр баар QR-кодунан киирэн, көрөн үөрэниэн сөп. Ааптардар сылга 4 нүөмэри таһаарар, инникитин киэҥ араҥаҕа тарҕатардыы былаанныыллар. Манна Хаҥалас улууһун уран тарбахтаахтарын, норуот маастардарын сырдатыахтара. Сериянан тахсыахтаах саҥа сурунаал үөрүүлээх сүрэхтэниитин Ыһыаҕы көрсө тэрийдилэр.