Үөрэххэ туттарсыы саҕаланна

Арктикатааҕы судаарыстыбаннай агротехнологическай университекка аны эһиилги үөрэххэ туттарсыы хамыыһыйата номнуо үлэтин саҕалаан, оскуоланы бүтэрээччилэр дөкүмүөннэрин хомуйсан саҕалаатылар. Быйылгы үөрэх дьылыгар 41 орто уонна үрдүк үөрэх хайысхаларыгар 1000 тахса бүддьүөт миэстэтэ көрүллүбүт. Бу сылга туттарсыыга эмиэ кыра уларыйыылар киирдилэр. Ол курдук күнүскү уонна кэтэхтэн үөрэххэ дөкүмүөнү тутуу болдьоҕо, өскөтүн инники сылларга араастаһар эбит буоллаҕына, быйылгаттан биир болдьоҕу анаатылар.

Павлина Васильева, АГАТУ  үөрэххэ туттарсыы хамыыһыйатын эппиэттээх сэкирэтээрэ: “Быйыл сайабылыанньаны суруйууга уларыйыы киирдэ. Ол курдук икки араас сайабылыанньа суруллар уонна биэс салааҕа туттарсыахха сөп буолла. Итиэннэ оҕо хайа идэни инники туруорарын нүөмэрдиирэ ирдэнэр”.

Университекка сыллата араас саҥа хайысхалар киирэллэр. Быйыл эмиэ экономическай факультекка "экономика" хайысхатыгар саҥа магистратура салаата арыллыаҕа. Манна 10 миэстэҕэ бакалавриаты эбэтэр специалитеты бүтэрбитин туһунан туоһу дипломнаах дьону кэпсэтии түмүгүнэн ылыахтара.

Олеся Винокурова, АГАТУ экономическай факультетын үөрэххэ туттарсыы хамыыһыйатын эппиэттээх сэкирэтээрэ: “Биһиги факультеппытыгар нэһилиэнньэҕэ ордук наадыйыллар идэлэргэ бэлэмниибит. Ол курдук экономика, торговое дело, менеджмент. Бу хайысхаларга сыл аайы Саха сирин оҕолорун сүүмэрдээн үөрэтэбит. Быйылгаттан магистратура киирдэ. Маныаха анаан тыа хаһаайыстыбатын сайыннарарга, дьон олоҕун тупсарарга анал программа оҥоһулунна”.

Орто анал үөрэх хайысхаларыгар эмиэ туттарсыы саҕаламмыт. Быйыл  10 хайысханан 115 оҕону ылыахтара. Манна 9-с уонна 11-с кылаас кэннэ аттестат орто сыанатынан куонкуруһу ааһан үөрэххэ киириэхтэрэ. Сокуоннай саастарын ситэ илик оҕолорго анаан туспа уопсай дьиэ көрүллэр. Онон бүддьүөт миэстигэр хапсыбыт устудьуоннар уопсайга олорор кыахтаналлар.

Мария Прохорова - АГАТУ орто анал үөрэх туттарсыы хамыыһыйатын эппиэттээх сэкирэтээрэ: «9 кылаас кэннэ программист идэтэ баар. Маны сэргэ юрист, бухгалтер, повар, кондитер идэлэригэр оҕолору ылабыт. Мантан программист идэтигэр 40 бүддьүөт миэстэтэ баар. Онтон атыттара төлөбүрдээхтэр».

Уопсайа университекка зоотехник, агроном, сир үлэһитэ, программист уонна да атын тыа хаһаайыстыбатыгар сыһыаннаах идэлэргэ үөрэтэн специалистары бэлэмнээн таһаараллар. Докумуону хомуйуу араастаан ыытыллар. Госуслуги портал, университет сайтын, почта нөҥүө ыытыаххытын сөп, эбэтэр бэйэҕит кэлэн туттарыаххытын сөп.