Медицинэ сайдар тэтимэ мантан ыла өссө күүһүрүө

Күүстээх клиническэй база, эксперт - кылаастаах аныгы медицинэ тэриллэрэ итиэннэ үрдүк квалификациялаах исписэлиистэр.  Сыл анараа өттүгэр үлэлээн саҕалаабыт сүрэх - тымыр киинэ номнуо көдьүүстээҕин көрдөрдө. Ол курдук өлүү ахсаана 10% итиэннэ эдэр дьон сүрэх ыарыыттыттан олохтон туорааһыннара 14% аччаабыт.

Күндүл Иванов, сүрэх-тымыр киинин дириэктэрэ: "Лаппа аччааһыны биһиги кииммитигэр саҥа технологиялары, дистанционнай көмөнү, сэрэтэр үлэ уонна телемедицинэ кыаҕын туһаныы түмүгэр ситистибит. Ону сэргэ 800 тахса киһи улуустан санрейсынан кэлэннэр, суһал көмө ыланнар медицинэ кыаҕын туһаммыттара үлэбит түмүгэр биллэн таҕыста. Араас элбэх операциялары оҥороммут биһиги дьон олохтон туорааһынын кыччаттыбыт".

Саҥа кииҥҥэ барыта  1,5 тыһыынча араас эпэрээссийэ оҥоһулунна. Сыл устата манна 4,5 тыһыынча киһи балыыһаҕа сытан эрэ эмтэннэ, онтон 5,5 тыһыынча киһи тастан көрдөрүнэн туһааннаах көмөнү ылла. Уустук эпэрээссийэлэр оҥоһуллар буоллулар. Ол курдук сүрэх тэбиитин көннөрөр имплантаннары туруоран саҕалаатылар. Маны сэргэ киин үлэһиттэрэ төгүрүк суукка телемедецинэ көмөтүнэн улууска көмө оҥороллор. Сылга маннык ньыманан 3 тыһыынча киһи сүрэҕин, тымырын эмтээтилэр.

Бүтэһик сылларга Саха сиригэр хаһан да суох элбэх доруобуйа харыстабылын эбийиэгэ үлэҕэ киирдэ. Ол иһигэр 2 оройуон киинин балыыһата уонна 65 фельдшерскэй-акушерскай пуун. Онтон сотору кэминэн онкологическай диспансер үлэҕэ киириэҕэ. Туутуу түмүктүүр түһүмэххэ тиийэн турар. Медицинэ сайдар тэтимэ мантан ыла өссө күүһүрүө. Бу барыта хас биирдии киһи өрөспүүбүлүкэ таһыгар тахсыбакка эрэ үрдүк кылаастаах эмтэниини ыларын туһугар.

Айсен Николаев, СӨ Ил Дархана: “Кэнники сылларга доруобуйа харыстабылын систиэмэтэ күүстээхтик инники диэки хардыылаата. Батстатан туран, бу материальнай-техническэй хааччыллыы,  медицинэ бөдөҥ эбийиэктэрин олоххо киллэрии. Онкологическай диспансер үлэлээтэҕинэ ыарыыны эрдэттэн сэрэтии күүһүрүө итиэннэ дьон өрөспүүбүлүкэ тас өттүгэр барбакка эрэ үрдүк таһымнаах эмтэниини ылыа.”

Быйылгы медик күнэ үрүҥ халааттаах аанньалларга ураты суолталаах. Ковид -19 ыарыыны  кыайан, кутталлаах режим уһуллубут кэмигэр  идэлээх бырааһынньыктарын бэлиэтииллэр. Бу сыстыганнаах ыарыыны утары барыта 9 тыһыынчаттан тахса эмчит үлэлээтэ. Кинилэри  Саха тыйаатырын үрдүк сыанатыттан наҕараадалаатылар, махтал тылларын эттилэр.

Дмитрий Андросов, өрөспүүбүлүкэтээҕи 2-с №-дээх суһал көмө киинин реанимация уонна анестезиология  салаатын сэбиэдиссэйэ: “Биһиги балыыһабыт быраастара хамсык кэмигэр сүрдээх улахан үлэни көрүстүлэр. Наһаа элбэх ыарахан ыарыһах киирэр этэ. Холобура, биһиги реанимациябытыгар сылга 3 тыһыынчаттан тахса киһи киирэн таҕыста. Бары туруктара ыарахан этэ. Барытын тулуйан хамсыгы аһардыбыт”.

Быраастарга аналлаах дьоро тэрээһиҥҥэ этиллибитинэн олох орто кээмэйэ үрдээбитин бэлиэтээтилэр. Маныаха медицинэ сайдыытыгар болҕомто сыллата үрдүүрүн ыйдылар.