Куртаҕы көрөр уонна эмтиир саҥа аппараат кэллэ

Эндоскопия салаатын хоһугар ыарыһахтар ис уорганнарын чинчийэллэр. Бу аҕыйах хонуктааҕыта саҥа тэрил кэлэн үлэлэрин таһыма өссө үрдээн, балыыһа үлэһиттэрин үөрүүтэ үгүс.

Ыарыһах кэлэн сыппытын кэннэ аныгы видеогастроскоп тэрилинэн быраастар ыарыһахтар айахтарыгар  камералаах трубканы киллэрэн чинчийии үлэтин ыыталлар.  “Саҥа тэрил уруккутааҕар быдан ордук, ис уорганы көрүү лаппа тубуста», -  диэн эндоскопист быраас Иннокентий Толстяков кэпсиир. 

"Пентекс" диэн японскай саҥа видеогастроскоп  уруккуттааҕар улахан уратыта суох. Ол эрэн көрдөрөр хаачыстыбата тупсаҕай. Быраастар араастаан чугаһатан, ыраатыннаран киһи ис уорганнарын чинчийэллэр. Итиэннэ тутатына кыра эпэрээссийэлэри оҥороллор

Радик Степанов, өрөспүүбүлүкэтээҕи 2-с №-дээх балыыһа суһал көмө киинин эндоскопическай салаатын сэбиэдиссэйин эбээһинэһин толорооччу: “Аппараат көрдөрөр хаачыстыбата HD, онон иһи-үөһү чинчийии тубуста. Маны тэҥэ бу тэрилинэн куртах бааһын уонна искэҥнэри эмтиибит”.

Аппарааты туттан бүттүлэр да медицинэ сиэстирэлэрэ тутатына барытын сууйан, сотон, анал дезинфекцияны оҥорон аныгыс туттууга бэлэмнииллэр. Саҥа кэлбит аппараат дезинфекцияны оҥорууга  табыгастааҕын сиэстирэлэр бэлиэтииллэр.

Бүтэһик сылларга өрөспүүбүлүкэтээҕи 2-с №-дээх балыыһа суһал көмөтүн киинигэр саҥа үрдүк таһымнаах аппарааттар кэлэннэр үлэлэрин таһыма үрдээн, ыарыһахтары эмтээһин хаачыстыбата тупсар. Өссө даҕаны инникитин бу курдук аныгы тэриллэр көмөлөрүнэн медицина эйгэтин өҥөтө сайда туруоҕа.