Птицефабрика оройуонугар үрдүк кыамталаах хочуолунай тутуллар

40

Главное

Птицефабрика оройуонун саҥа хочуолунайыгар үлэ күөстүү оргуйар. Үлэһиттэр дьиэ көҥдөйүн бүтэрэн аны оһохтору, араас инженернай ситимнэри оҥоро сылдьаллар. Биригэдьиир этэринэн үлэ былааннаммыт больдоҕунан этэҥҥэ баран иһэр. Саҥа хочуолунайы "Ленагазстрой" тэрилтэ ылсан аны балаҕан ыйыгар диэри сүрүн үлэлэрин бүтэрэн, аны кыһын хочуолунай толору үлэлиир кыамтатыгар тахсыаҕа.

Геннадий Винокуров, биригэдьиир: "Ууну хачайдыыр улахан турбалары таҥа сылдьабыт. Матырыйаалбыт үксэ кэллэ. Сотору кэминэн носуостары туруортуохпут, гаас ситимигэр хочуолунайбытын холбуохпут".

Птицефабрика оройуонун хочуолунайа 1969 сыллаах тутуу. Оһохторо 30-тан тахса сыл үлэлээн, эргэрэн "Теплоэнергия" тэрилтэ быһаарыытынан быйыл саҥа хочуолунайы тутан үлэҕэ киллэрэр сорук турар.

Саҥа хочуолунайга 3 саҥа оһох номнуо турбут. Кыамталара  10-нуу киловатт. Бу Птицефабрика оройуонун бүтүннүү сылааһынан уонна итии уунан хааччыйыыга тиийэр.

Хочуолунай аныгы кэм ирдэбилинэн күөх төлөнүнэн оттуллуоҕа уонна дьон көрүүтүгэр-истиитигэр наадыйбат. Оһоҕу холбооһун, ууну ититии, нэһилиэнньэни сылаас ууннан хааччыйыы барыта көмпүүтэр нөҥүө ыытыллыаҕа. Онон көлөһүн тохтуулаах ыарахан үлэ бу эбийиэккэ суох буолуоҕа. "Тутуу матырыйаалын, хочуолунай тэриллэрин эрдэтинэ удамыр сыанаҕа атыылаһан сыана үрдээһинигэр улахан охсуута суох тута сылдьабыт" диэн Пётр Фёдоров бэдэрээччит үөрэр. 

Саҥа хочуолунай 47 муниципальнай элбэх кыбарытыыралаах дьиэлэри, 2 социальнай эбийиэги уонна 135 чааһынай дьиэни сылааһынан хаачыйыаҕа. Онон саҥа олох-дьаһах коммунальнай хаһаайыстыба эбийиэгэ тутуллан киин куорат биир бөдөҥ оройуонун олоҕун тупсарарга төһүү күүс буолуоҕа.

Василий Лепчиков, "Теплоэнергия" тэрилтэ сүрүн инженерэ: "Саҥа хочуолунай ахсынньы 1 күнүгэр үлэҕэ киирэр болдьохтоох. Онон уматык сезонугар эргэ хочуолунайбытын үлэлэтиэхпит".  

Уопсайа быйыл киин куоракка саҥа 2 хочуолунай  үлэҕэ киириэҕэ. Итиэннэ коммуналльнай хаһаайыстыба үлэһиттэрэ кылгас сайыҥҥы кэми туһанан аныгыскы оттукка бэлэмнэниилэригэр киирдилэр.

Читайте также