50 сыллааҕыта бүтэрбит геологтар көрсүһүүлэрэ

РМ - 68 бөлөх устудьуоннара преподавателларын Рево Миронович Скрябин эҕэрдэ тылын истэллэр. Бу курдук 50 сыл анараа өттүгэр, уһуйааччылара Саха сирин экономикатын сайдыытыгар олус туһалаах үөрэҕи бүтэрбиттэрин бэлиэтээн туран, дьупулуом туттартаабытын бу баардыы өйдүүллэр. Геология идэтин "көмүс үйэтэ" диэн аатттанар сыллары баттаһа идэ ылбыт уонна күүскэ үлэлээбит бөлөх геологическай факультет биир чаҕылхай выпуһа.

Николай Кириллин, СГУ инженернэй-техническэй факультетын РМ-68 выпускнига: "Бары улуустартан бары бааллар этэ. Ол эрэн бүтэрэрбитигэр 30 эрэ буолан хаалбыппыт. Биһиги олус түмсүүлээх буолан биэрдибит, атыттарга холоотоххо. Бары бэйэбит хайысхабытынан  үлээбиппит. 90 -сс.  түһүү буолбатаҕа буоллар өссө да үлэлиэхтэр этэ. Ол гынан баран атын сиргэ барбыт оҕолор эмиэ олус бэйэлэрин көрдөрдүлэр".

Саха сирэ аан дойдуга элбэх саппаастаах таас чох, ниэп-гаас, алмас, кыһыл көмүс, хорҕолдьун уонна да атын сир баайдааҕынан биллэр. Суолу тэлээччи геологтар ааспыт ыллыктарыгар РМ - 68 выпуск эмиэ бэйэтэ туспа суолу-ииһи хаалларда. Бу бөлөх баһыйар үгүһэ Дьокуускайдааҕы геологическай салалтаҕа үтүө суобастаахтык үлэлэрин саҕалаабыттара итиэннэ өрөспүүбүлүкэ сайдыытыгар сүҥкэн кылааты киллэрбиттэрэ. Онтон бүтэрбиттэрэ 50 сыллаах көрсөһүүгэ бу ситиһии уһуйааччылара Рево Миронович өҥөтө буоларын өссө төгүл туһаайан эттилэр, махтаннылар. 

Рево Скрябин, ХИФУ геологическай факультетын преподавателя, профессор: "Урукку устудьуоннарбын, билиҥҥи сааһырбыт кырдьаҕастары, бэккэ диэн өйдүүбүн. Онон миэхэ эмиэ бу көрсүһүү эдэр сааспын санатар. Мин бэйэм университекка 1958 сыллаахтан баччааҥҥа диэри үлэлии сылдьабын. Кэлэр көлүөнэ ыччакка Саха сиригэр сир баайа элбэҕинэн сибээстээн геологическай идэни баһлыылларыгар ыҥырабын".

Истиҥ көрсүһүүгэ этиллибитэн, геолог идэтигэр наадыйыы билигин төптөрү үрдээбит. Бүтэрээччилэр ахсааннара үлэ биэрээччилэр наадыйыыларын саппат. Онон факультет төһө баҕар кэҥиир, сайдар кэскиллээҕин ыйдылар.  Бу иһитиннэриини олохторун геология салаатыгар анаабыт аҕам саастаахтар олус биһирии уонна  киэн тутта иһиттилэр. Бастыҥ выпуск РМ-68 үөлээннээхтэрин, уһуйааччыларын уонна билиҥҥи көлүөнэ устудьуоннары кытары көрүстүлэр, баай уопуттарыттан  үллэһиннилэр.

Денис Олесов, ХИФУ геологическай факультетын  устудьуоннарын идэлээх сойуустарын бэрэссэдээтэлэ: "РМ-68 выпускниктара бачча сыллар тухары бииргэ тутуһан сылдьаллара биһиэхэ холобур буолар. Бу көрсүһүүгэ элбэҕи сырдаппыттарыттан, кэпсээбиттэриттэн сүрдээҕин үөрдүбүт. Онтон биһиги, кэлэр көлүөнэ, факультеппытын сайыннара туруохпут".

Ыччаты аҕа көлүөнэ уопутугар иитии геологическай факультекка инники күөҥҥэ. Маныаха быйыл саҥардыллан оҥоһуллубут музей маннык истиҥ көрсүһүүлэри тэрийиигэ, бу хайысха инники сайдыытын торумнуурга көлүөнэ алтыһыытыгар бэртээхэй былаһаакка буолла.