Үс Хатыҥҥа Туймаада ыһыаҕа буолара икки нэдиэлэ хаалла

Үс хатын сирэ – уота билигин саҥа мас, сибиэһэй кырааска сытынан дыргыйар. Саҥалыы тупсаҕай тутуулар ыһыах ыһыллар туонатын өссө киэргэтэллэр.  Саха норуотун баай култууратын,  сиэрин – туомун дьэҥкэтик көрдөрөр түһүлгэлэр сылтан сыл эбиллэллэр. Эдэр тутааччылар биригээдэлэрэ баараҕай балаҕаны өһүөтүн баайан, түмүктүүр түһүмэххэ кэлбиттэр. Бастакы балаҕаннара буолан, сиэри-туому, тутуу ымпыгын-чымпыгын үгүс литератураны хасыһан сирдэтэллэр, уопуттаах дьон үлэтин көрөллөр.

"Бастаан дьиэттэн саҕалаабытым. Соҕотуопкаттан тахсан испитим, манна бу бары бастакы бырайыакпыт. Баары маастардар буолан, сүбэлэһэ-сүбэлэһэ оҥорорбут. Эрнст кинигэтэ баар, үксүн онон сирдэтэбит, тирэхпит ол буолар. Эрнст оҥорбут балаҕанын баран хаста да көрөбүт, маны маннык оҥорбут диэн көрөн-истэн билэбит", - диир тутуу биригээдэтин маастара  Эрчим Охлопков.

Балаҕан 10х15 кээмэйдээх. Баҕаналарыгар туттуллубут суон мастар олохтоох тутуу матырыйаала. Аныгы кэм тутуута буолан акылаакка түһэриллибит. Ол эрэн, эркиннэрэ былыргылыы сайыҥҥы куйааска сөрүүн, онтон күһүҥҥү тымныыга сылаас буоллун диэн  халыҥнар.

Онтон бу тутуу ситтэҕинэ-хоттоҕуна, күн сыралҕаныттан хаххаланан олорон ыһыах аһын аһыыр маанылаах түһүлгэ буолуохтаах. Баҕаналара сэргэ быһыылаахтар, оһуордаах - мандардаах. Кэлин өттө балаҕан курдук туруору мастарынан эркиннээх буолуоҕа диэн тутааччылар үллэстэллэр. Биригээдэҕэ эмиэ бары үгүстэрэ эдэрдэр. Кинилэргэ маска уопуттаах Роман Петров  сүбэ-ама буолар. Маныаха анаан кини Горнай улууһун Бэс Күөлүттэн кэлбит:  

"Аарка оҥоһуллуохтаах, уруһуйгар оннук этэ. Онно тиийэ иликпит. Саамай үлэлээҕин муостатын, үрдүн бүтэрэ сылдьабыт. Күн-дьыл үчүгэй, хата туран биэрдэ, сөрүүн. Тыаллаах буолан ууһанарга үчүгэй".

Быйылгы Туймаада ыһыаҕа "Дьокуускай - килбиэннээх үлэ куорат" девиһынан ыытыллар. Маны сэргэ Дойдуга "Учуутал уонна уһуйааччы", Өрөспүүбүлүкэҕэ "Үлэ" сылыгар уонна саха халандаарынан "Дьөһөгөй Айыыга" ананар. Онон ыһыах ис хоһооно, тутула  саха сылгытыгар сүгүрүйүү быһыытынан барыаҕа. Итиэннэ Үлэһит дьону чиэстээһин, учууталлар, уһуйааччылар сүрүн болҕомтоҕо буолуохтара. 

Туймаада ыһыаҕа Саха сирин бука бары талба талааннаахтарын, уус тыллаахтарын түмүөҕэ, ырыа-тойук тохтообокко дьиэрэйиэ, күҥҥэ сүгүрүйүү  бэлиэтэ оһуохай оройуттан тутуллуо. Үгэс курдук, ыһыах иитинэн Дыгын оонньуулара, Ил Дархан уонна Дьокуускай Аҕа быһылыгын бириистэригэр ат сүүрдүүтүгэр күрэхтэр буолуохтара.