Горнай Бэрдьигэстээҕэр «Үрүҥ уолан» курэхтэһии буолла

Сайыҥҥы маҥнайгы күннэри көрсө, Бэрдьигэстээх "Чыпчаал" стадионугар, ону тэҥэ сынньалаҥ пааркатыгар  2006 сылтан бэттэх төрөөбүт уолаттар ортолоругар "Үрүҥ уолан 2023" төрүт спорт 5 көрүҥэр бастакы улахан күрэхтэһии буолла. Манна  14 саастарыттан саҕалаан 17 диэри уолаттар кыттыыны ыллылар. Ол курдук Коля Копылов, Алеша Ефремов, Сулустаан Егоров, Эдик Захаров, Вова Варламов уонна Борис Андреев.  Маҥнайгы көрүҥ үс төгүл үс буолла, бу көрүҥҥэ Борис Андреев 27 м. 91 см. ыстанан утарсааччыларын ырааҕынан куоһарда, иккис үчүгэй көрдөрүүлээх Вова  Варламов,  кини  көрдөрүүтэ 24 м. 70 см, оттон Коля Копылов 24 м. 7 см буолла.

"Андреев Борис утарсааччыларын ырааҕынан быраҕаттаабыта. 2006 сылтан уонна онтон кыралар, ол аата 14, 15, 46 саастаах уолаттар кытыннылар", - диэн күрэхтэһии судьуйата Евгения Каленкова эттэ.

Хапсаҕайга утарсааччылары  сэрэбиэй быһаарда, бу көрүҥҥэ уолаттар ыйааһыннара да саастара да уратылаах буолан, үксүн саас, уҥуох уонна ыйааһын быһаарыылаах буолла. хапсаҕай түмүгүнэн Коля Копылов үһүс, Сулустаан Егоров  иккис уонна Борис Андреев бастакы  буоллулар.

Курэхтэһиини  Бэрдьигэстээх нэһилиэгин дьаһалтата, ыччат политикатыгар, култуураҕа уонна спортка агентствота уонна  нэһилиэк аҕаларын түмсүүтэ тэрийэн ыыттылар. Күрэхтэһии үһүс  көрүҥэр уолаттар 2 мүнүүтэ иһигэр  тутум эргийдилэр.  Манна Алеша Ефремов 47 кулахачыйа охсон тэҥнээҕин булбата, оттон Борис Андреев бу да сырыыга куһаҕана суох көрдөрүүлэнэн 30 эргийдэ,  кини кэнниттэн атах баттаһа Сулустаан Егоров 28 эргийдэ.

Мас тардыһыытыгар Алеша Ефремов  утарсааччыларын барыларын баһыйа тутта, иккис Вова Варламов, үһүскэ Борис Андреев таҕыстылар.

Түмүктүүр түһүмэххэ 65 киилэ ыйааһыннаах, инчэҕэй кумахтаах куулу, көтөҕөн ырааҕы хаамыыга куоталастылар. Бу көрүҥҥэ ус уол араа-бараа тэҥ сыһа ырааҕы бардылар. Ол курдук, Алеша Ефремов 160 м. 30 см. баран 3 миэстэ, Борис Андреев 162 м. 47 см. баран 2 миэстэ уонна Коля Копылов оруобуна 170 миэтирэни баран 1 миэстэни ылла. Уопсай түмүккэ 3 миэстэни Николай Копылов ылан  3 тыһ. солкуобайдаах  сертификатынан наҕараадаланна, оттон иккис миэстэҕэ Бэрдьигэстээх Семен Данилов аатынан орто оскуола 8 кылааһын быйыл бүтэрбит Алеша Ефремов тахсан, 5 тыһ. солкуобайдаах сертификаты тутта.

"Евразия призерабын, Өрөспүүбүлүкэҕэ тутум эргиирин призерабын, Лөгөйгө иккитэ многоборьеҕа кытта сылдьыбытым", - диир "Үрүҥ уолан -2023" күрэххэ 2-ис миэстэ хаһаайына Алексей Ефремов.

Муҥутуур кыайыылааҕынан үгүс көрүҥнэргэ үчүгэй көрдөрүүлээх, Афанасий Осипов аатынан Бэрдьигэстээх орто оскуолатын 10 кылааһын быйыл бүтэрбит Борис Андреев тахсан,  нэһилиэк аҕаларын түмсүүтүн уонна сүрүн спонсор  "Горнай ас" тыа хаһаайыстыбатын бородууксуйатын оҥорон таһаарар кээпэрэтиибин   салайааччытыттан,  Николай Ефремовтан,  Телевизор бирииһи тутта.

"Многоборьенан уонна мас тардыһыынан дьарыктанабын, тренерым Соловьев Александр Павлович. Ол иннинэ 2005-2006 сылларга төрөөбүт уолаттар икки ардыларыгар Өрөспүүбүлүкэҕэ бастыыр иһин күрэххэ 2 миэстэ буола сылдьыбытым. Уонна Өрөспүүбүлүкэҕэ мас тардыһыыга 3 миэстэ. Куул көтөҕүүтүгэ сыалбын толорботум, 200 миэтирэни бараары гыммытым, куулум түһэн хаалбыта", - диэн "Үрүҥ уолан -2023" күрэх муҥутуур кыайыылааҕа  Борис Андреев кэпсээтэ.

Улахан күрэхтэһии биллэн турар спонсардара суох сатаммат, онон тэрийээччилэр олохтоох эргиэмситэргэ Туйаара Исаковаҕа уонна Андрей Васильевка көмөлөрүн иһин махталларын тириэрдэллэр. Оттон бу быйылгы үрүҥ уолан күрэҕэр кыттыбыт  уолаттарбыт салгыы кынат анньынан, аны аҕыйах сылынан Дыгын оонньууларыгар киирсэн  турдаллар, дойдуларын аатын ааттатыах этилэр.