Өрөспүүбүлүкэ үрдүнэн сайыҥҥы лааҕырдар үлэлэрин саҕалаатылар

42

Бэс чагда лааҕыра маннайгы сезонун ыам ыйын 31 күнүттэн саҕалаабыта. Хас биирдии сезон туспа хайысханан барар. Оҕолор 21 күн устата элбэххэ үөрэнэллэр, манна эти-хааны чэбдигирдэр араас дьарыктар, сайыннарар үөрэх, маны таһынан араас идэлээх дьон кыттыылаах маастар-кылаастар, аһаҕас кэпсэтиилэр ыытыллыахтара. Быйыл Бэс чагда киинэ 4 салаанан үлэлиэҕэ, онон өссө элбэх оҕону хабар былааннаахтар.

 

"Биһиги кииммит 3 бааза арыйаары турар. Бастакы баазабыт Энергетик лааҕыр уонна Связист, Кэскил лааҕырдары арыйыахтаахпыт. Бу сайын устата 4 смена үлэлиэхтээх. Маҥнайгы смена “Содружество-отряд России”, иккис сменабыт бэс ыйын 22 күнүттэн арыллыаҕа, “Я гражданин России” диэн. Үһүс “Привет, Артек!”, бу Бүтүн Россиятааҕы “Артек”  оҕо киинэ 100 сылыгар ананыаҕа. Төрдүс “Время первых” – бу Өрөспүүбүлүкэҕэ баар чулуу оҕолор кэлэн кыттыыны ылыахтара", - диэн "Бэс чагда" эбии үөрэхтээһин уонна оҕону иитии салаатын методиһа Марфа Булатова кэпсээтэ.

 

Бэс чагда лааҕырыгар Өрөспүүбүлүкэ араас муннугуттан  оҕолор кэлэн сынньаналлар. Маҥнайгы сезоҥҥа лааҕыр алын кылаас оҕолорун ылла. Мария Иванова бастакы этэрээт баһаатайа, этэрээтигэр 24 оҕолоох. Мария баһаатайынан былырыыҥҥыттан үлэлиир. Үлэбин олус сөбүлүүбүн, баһаатай буолар олус эппиэтинэстээх, хас биирдии оҕону кытта тыл булсан, тапсан үлэлиэххэ наада диэн этэр.   

 

"Баһаатай, бастатан туран, эппиэтинэстээх буолуохтаах. Оҕолору барыларын кытта тапсыахтаах. Мин кыра оҕолору кытта быдан тапсабын, биир тыл булан оонньуубут, чэпчэки соҕус", - диир баһаатай  Мария Иванова.

 

Бүлүү улууһуттан сылдьар Айсен Петров Бэс чагда лааҕырыгар аан бастакытын сынньана кэллэ. Лааҕыры олус сөбүлээтим, элбэх доҕоттордоннум диэн үөрэр. Саамай сөбүлүүрүм футбол, күн аайы эбиэт кэннэ былассааккаҕа тахсарбын эрэ күүтэбин диэн этэр. 

 

Быйыл Саха сирин үрдүнэн 500 тахса оҕо сайыҥҥы лааҕыра үлэлиэҕэ. Араас хайысхалаах лааҕырдарга 40 тыһыынчаттан тахса оҕо хабыллара былааннанар.  Билигин бары лааҕырдарга бастакы сезон үлэтин саҕалаата.