Талааннаах худуоһунньук, дизайнер уруһуйдуур ураты кистэлэҥин арыйда

Афанасий Собакин Саха сирин биир бастыҥ худуоһунньуга буолар. Кини аатын иһиттилэр эрэ, көрөөччүгэ тута "Кыталыктар үҥкүүлэрэ" хартыыната көстөр. Бу үлэтэ кини аатын-суолун таһаарбыт, тоҥуу хаары тобулаабыт ситиһиитинэн буолар. Оттон кыыһа Ольга Скорикова билигин кини туйаҕын хатаран худуоһунньуктар сойуустарын бэрэссэдээтэлэ буолан, бэйэтин ураты истиилин киэҥ эйгэҕэ тарҕатар.

Быыстапка муус устар 26 күнүгэр Түмэл выставочнай саалатыгар арыллыбыта. Аҕа кыыһынаан сэргэ турар үлэлэрэ, көрөөччү киэҥ биһирэбилин ылбытын бэлиэтээтилэр. Худуоһунньук бэйэтэ бэлиэтииринэн, аҕатыттан олус ураты ньымалары туһанан, туспа суоллаах иистээх буолар. Ол эрээри, кыра эрдэҕиттэн аҕата уруһуйдуурун көрөн, киниттэн элбэххэ үөрэммитин айар улэтэ  туоһулуур.

"Быыстапка аата Единство противоположностей диэн. Музейга быыстапкаҕа 70 тахса үлэ баар, бэс ыйын 12 күнүгэр диэри үлэлиир. Афанасий Петрович Собакин кыыһа аҕатын туйаҕын хатаран туспа суоллаах-иистээх худуоһунньук", - диир уус-уран ойуулуур-дьүһүннүүр түмэл мэтэдьииһэ Наталья Федорова.

Дьокуускай куорат олохтоохторо, чуолаан ыччат дьон, устудьуоннар түмэл түһүлгэтигэр мустан сүгүрүйэр худуоһунньуктарыттан элбэх интэриэһинэйи биллилэр. Ольга Скорикова айар үлэтигэр сүгүрүйээччилэр маастар кылааска оҥостон кэлэн, элбэх саҥа тиэхиникэҕэ үөрэннилэр. Маны таһынан, саҥа саҕалааччыларга: худуоһунньук киһи хантан иэйии ыларын, кэрэни көрө үөрэнэргэ, норуокка хартыына нөҥүө өйдөбүлү тириэрдэргэ сүбэ биэртэлээтэ.

"Мин бу быыстапкаҕа худуоһунньук ханнык техниканы туттарын көрө кэллим. Бэйэм эмиэ уруһуйдуубун, гуаһынан, маслонан", - диэн Дьокуускайдааҕы уруһуй колледжын устудьуона Күннэй Потапова кэпсээтэ.

"Ольга Скориковалыын көрсүһүүттэн, бастатан туран көрүҥнэрин үөрэтэбин. Живопись диэн предмет баар биһиэхэ, ол онно  истииллэрин көрөбүн. Бэйэбэр тугу эмит ылыныам буоллаҕа", - диэн Дьокуускайдааҕы уруһуй колледжын устудьуона Уйгун Николаев санаатын үллэһиннэ.

Антиграттаж диэн тиэрмини айан, бу көрсүһүү кыттыылаахтарыгар саҥа уруһуй биир көрүҥүн арыйда. Чүмэчини анал кумааҕыга уулларан, ол үрдүгэр акварелинэн уруһуйдаан ускуустуба биир көрүҥүн бйэлэригэр арыныахтара. Хас биирдии хартыына хатыламмат кэрэ, бэйэтэ туспа ис хоһооннонон үйэлэргэ өйдөбүнньүк буолан хаалыа.