Хомсомуол болуоссатыгар рассада атыытын үгэнэ

Хомсомуол болуоссатын аттыгар эрээттэргэ кыһынын эт-балык кэчигирэһэр буоллаҕына, сайыҥҥы кэмҥэ күөх үүнээйи тэлгэнэр. Быйыл дьыл арыый хойутаан, хортуоппуй олордуутун үгэнэ. Онон сиэмэ хортуоппуйу хото атыылыыллар. Биир дьааһык хортуоппуйу 7 мөһөөх, биэдэрэ аҥарын 3 мөһөөх диэн быспыттар. Родион Ефремов Хаҥалас улууһун Булгунньахтаах нэһилиэгин хортуоппуйун атыылыыр. Ыһыыга даҕаны, сииргэ даҕаны хортуоппуй элбэх. 

Родион Ефремов, атыыһыт: “Сиэмэ хортуоппуйу киилэтин 70 солбуобайга атыылыы турабын. Розара, Ред Скарлет, Гала уонна Якутяночка. Дьон ордук якутяночканы уонна Розараны хамаҕатык ылар”.

Атыы көрдөххө үчүгэй, сотору-сотору наадалаах дьон, иккилии, биирдии дьааһыгы атыылаһан бараллар. Манна ырыынакка сыллата чааһынайдар кэлэн оҕуруот аһын, сибэкки рассадатын атыылыыллар. Сүрүннээн манна сибэкки араас рассадата тэлгэммит. Дьэрэкээн өҥнөөх сибэккилэр уйгу сайыммыт кэрэтин көрдөрөрдүү үүнэн силигилээн туралларын көрүөххэ үчүгэйэ.  Куорат олохтооҕо Зинаида Федорова даачатыгар сибэкки олордорун сөбүлүүр. "Сүрүннээн өр сыллаах сибэккилэри үүннэрэ сатыыбын", - диэн кэпсиир. Онон гвоздика атыыласпыт.

Сибэкки рассадата көрүҥүттэн көрөн 50 солкуобайтан 150 диэри сыанаҕа атыылынар. Петуниялар 50 солкуобай, холобура, эриэккэс Портулак, Табак, Газания 80-150 солкуобайга тураллар.  Оҕуруот аһа эмиэ 50 солкуобайтан ыла саҕаланар.  Сүрэхтээх дьон бүөбэйдээн, буору, сиэмэни кытта эрдэттэн тустан өлгөм үүнүүнү ылан атыыга таһааран, дохуот аахсар. Дьон үксэ рассада сыанатын кытта сөпсөһөр.

Нам улууһун Хатырыгыттан кэлэ сылдьар Мария Слепцова саад дьэдьэнин рссадатын ыла кэлбит. "Былырыыҥҥаттан ыла олордо сатыыбын, үчүгэйдик табылла илик, бу сырыыга амсайар инибин", - диэн этэр.

Ким клубника, ким сибэкки, оттон ким оҕуруот аһын рассадатын атыылаһар.

Билигин дьон үксэ бэйэлэрин тиэргэннэригэр, оҕуруоттарыгар анаан рассаданы хото атыылаһар. Мантан кэнники атыы-тутуу өссө элбиэ турдаҕа.