5,5 тыһыынча оҕо сайыҥҥы кэмҥэ үлэлиэ

Оҕо дыбарыаһын дьиэтигэр үгэскэ кубулуйбут оскуола оҕолоругар анаан үлэ дьаарбаҥкатыгар сүүһүнэн оҕо кэлэн үлэ көрдөннө. Манна араас идэлэргэ үлэ биэрээччилэр сайыҥҥы кэмҥэ оҕолору үлэлэтиэхтэрэ. Саха өрөспүүбүлүкэтин дьарыктаах буолуу киинэ иһитиннэрбитинэн, быйыл Саха сирин үрдүнэн 5,5 тыһ. тахса оҕону үлэҕэ ылар сорук турар. Үөрэнээччилэри үлэҕэ ылыыны үөрэх салалталара итиэннэ нэһилиэнньэ дьарыктаах буолуутун кииннэрэ сүрүннүөхтэрэ. Үлэ инсипиэксийэтэ сокуоннай саастарын ситэ илик оҕолору үлэлэтиигэ сокуону, ирдэбиллэри тутуһууну хонтуруоллуохтара.

Игорь Соловьёв, СӨ дьарыктаах буолууга киинин салайааччытын солбуйааччы: «14 саастарыттан 18 диэри оҕолору сайын быстах кэмҥэ үлэҕэ ылыахха сөп. Үлэ биэрээччи сокуоннай сааһын ситэ илик үөрэнээччилэри ирдэбилгэ толору эппиэттээн туран үлэ усулуобуйатын тэрийиэхтээх».  

Оҕолору сүрүннээн официант, курьер, диспетчер уонна лааҕырдарга куруһуок ыытааччынан уонна баһаатайынан үлэлииргэ ыҥыраллар. Үлэ дьаарбаҥкатыгар үксүн инники үлэлии сылдьыбыт оҕолор кэлэн туоһулаһа сылдьаллар. Манна эмиэ үгэс быһыытынан тэрилтэлэр уопуттаах оҕолору сэҥээрэллэр, итиэннэ элбэх оҕолоох, араас социальнай араҥаҕа киирсэр ыал оҕолорун ордук үлэҕэ ылыахтара.

Оҕолор  уһун кэмнээх сайыҥҥы сынньалаҥнарын туһалаахтык атааран, үлэлээн хамнас аахсан, аны күһүн оскуолаҕа барыы саҕана төрөппүттэриттэн тутулуга суох сөбүлүү көрбүт малларын атыылаһар баҕалаахтар. Үлэ биэрээччилэртэн толору хамнас аахсыахтара итиэннэ судаарыстыбаттан 5 тыһыынчаттан тахса солкуобай биир кэлим босуобуйаны ылыахтара. Ити сыалга анаан бүддьүөттэн 39 мөлүйүөнү көрүөхтэрэ.

Сокуон быһыытынан 14-тэриттэн 16-ларыгар диэри саастаах оҕолор нэдиэлэҕэ 24 чаастан элбэҕи үлэлиэ суохтаахтар. Онтон 16 үөһэ саастаах оҕолор 35 чаастан ордук үлэлииллэрэ көҥүллэммэт. Оттон 15 саастарыгар диэри оҕолору тэрилтэлэр төрөппүттэн көҥүлэ суох улэҕэ ылыа суохтаахтар.  Нэһилиэнньэ дьарыктаах буолуутун киинэ оҕолор үлэ булалларыгар көмөлөһөр итиэннэ үөскээбит ыйытыктарга хоруйу биэрэр.