Оҕо сынньалаҥа саҕаламмытынан суолга хонтуруол күүһүрэр.

Оҕолор сынньалаҥнара саҕаламмытынан сибээстээн, суолга куттал суох буолуу инспиэксийэтэ хонтуруолу күүһүрдэр. Ыам ыйын 15 күнүттэн, бэс ыйын 15 күнүгэр диэри рейдэлэр саҕаланнылар. Дьокуускай куоракка уонна чугастааҕы бөһүөлэктэргэ сэрэтии үлэтэ барар.

"Болҕойуҥ: оҕолор" профилактическай тэрээһин чэрчитинэн оҕолор төрөппүттэрин кытары ыкса күүстээх үлэ саҕаланна. Бу үлэ сүнньүнэн оҕо суол быраабылатын тутуһуута уонна сокуоннай саастарын ситэ илик оҕолор тимир көлө уруулугар олорботторун туһунан буолар. Чуолаан ПДН уонна участковай инспектордарын кытары икки көлүөһэлээх тырааныспартан, ол эбэтэр матасыыкылтан сэрэхтээх буолуҥ диэн биллэрэллэр.

Валерий Атласов, суолга-иискэ куттал суох буолуутун иниспиэксийэтин пропаганда иниспиэктэрэ: "Ханнык баҕар тимир көлө күлүүһүн сокуоннай сааһын туола илик оҕоҕо биримэн диэн үлэни ыытабыт. Сыл саҕаланыаҕыттан киин куоракка 1700 тахса суол быһылаана таҕыста, онно 27 оҕо араас эчэйиини ылла".

Сокуоҥҥа бу быраабыла биллэрин үрдүнэн, оҕоҕо тимир көлө күлүүһүн биэрэр төрөппүт, хомойуох иһин, элбэх. Бу  оҕо араас эчэйиини ыларыгар, эбэтэр өссө куһаҕанын, олоҕор улахан кутталы үөскэтэр.

Надежда Матвеева, ИДьМ сокуоннай саастарын ситэ илик оҕолору кытта үлэлэһэр салаа иниспиэктэрэ: "Оҕолор үксүн матасыыкылга, мопедка суол быраабылатын кэһэллэр. Маны сэргэ төрөппүттэр оҕолорго массыына күлүүһүн биэрэллэр. Саамай куттала диэн оҕолор саахалга түбэһиэхтэрин сөп".

Оҕо биирдэ маннык тахсан тутуллуута - олоҕун тухары ханна да сүппэт хара бээтинэтэ буолар. Ханнык баҕарар оҕо буруйу оҥоруутугар куруук төрөппүт эппиэттиирин умнар сатаммат. Сокуону билиммэт, хасыһын да кэһэр эбит буоллаҕына, бу оҕо төрөппүтүгэр анал опека үлэһиттэрэ кэлиэхтэрин сөп диэн суолга куттал буолуу инспекциятэ сэрэтэр.

Владимир Ощепков, СӨ суол-иис иниспиэксийэтин пропагандаҕа салаатын салайааччы: "Сокуоннай сааһын ситэ илик оҕоҕо тимир көлө күлүүһүн биэрбит төрөппүт административнай эппиэтинэскэ тардыллар. Ыстараап кээмэйэ 30 тыһ. солк.".

Бу тэрээһин чэрчитинэн Дьокуускай олохтоохторугар анал сэрэтэр флаердар бэрилиннилэр, кэпсэтиилэр ыытылыннылар. Оҕоҕо матасыыкыл атыылаһан бириэх туох-хайа иннинэ, олоҕор туох куттал суоһуурун өйдүүр оруннаах.