Ойууру чөлүгэр түһэрии тула дьүүллэһии барда

Арктикатааҕы агротехнологическай университетка үгэскэ кубулуйбут Ойуур хаһаайыстыбатыгар уонна промышленноһыгар үлэлии сылдьар дьон форума ыытылынна. Манна 150 тахса киһи кэлэн маһы туһаныыга, ойууру сөргүтүүгэ туох саҥа ньымалар баалларын уонна айылҕаны туһаныыга сүрүн кыһалҕалары дьүүллэстилэр.

Ойуур хаһаайыстыбатын уонна промышленнаһын үлэһиттэрэ Арктикатааҕы агротехнологическай университекка маһы кэрдии уонна тутуу боппуруостарын тула кэпсэттилэр. Манна Сахабыт сирин араас муннуктарыттан уонна дойдубут регионнарыттан кэлэн кыттыыны ыллылар. Сүрүн болҕомтону тустаах хайысхаларга исписэлиистэри бэлэмнээһиҥҥэ уурдулар. Ону тэҥэ 5 сыллааҕыта тэриллибит Ойуур хаһаайыстыбатын уонна сир оҥоруутун факультетын үлэтин түмүгүн билистилэр.

Мария Слепцова, АГАТУ ойуур комлексын уонна сир оҥоруутун факультетын декана: "Исписэлиистэри ыҥыран саҥа технологияны билсэн, ойуур хаһаайыстыбатыгар уонна ойуур промышленнаһыгар билигин ханнык саҥа үлэлэр бара туралларын кытта билсиһэбит. Оны тэҥэ биһиги сыалбыт-сорукпут бу хайасхаҕа исписэлиистэри бэлэмнээн таһаарыы буолар. Ол курдук 10 хайысхаҕа көҥүл ылан үлэлиибит".

Саха сирэ элбэх ойуурдардаах, тутууга табыгастаах мастардаах буолан оҥорон таһаарааччылар үрдүк болҕомтону уураллар.  Ону тэҥэ сайын ахсын элбэх баһаардар тахсаннар айылҕаҕа улахан хорумньу тахсар, тыһыынчанан гектар иэннээх, эриэккэс мастардаах ойуурдар сыллата умайар буоланнар форум чэрчитинэн ойууру сөргүтүүгэ, харыстааһыҥҥа саҥа ньымалар тустарынан кэпсэттилэр.

Андрей Михайлов, СӨ Айылҕа харыстабылын министиэристибэтин ойуур хаһаайыстыбатын департаменын салайааччыта: "Иллэрээ сыл улахан баһаардар турбуттара. Онтон былырыын арыый аҕыйах этэ. Үбүлээһин биэс төгүл улааппыта. Баһаар кэннэ тыалары кэтээн көрүү, умайбыт мастары ыраастааһын уонна чөлүгэр түһэрии үлэлэрэ ыытыллаллар".

Форумҥа 150-тан тахса киһи кэлэн кыттыыны ылла. Ол иһигэр Россия 7 араас регионнарыттан учуонайдар, ойуур хаһаайыстыбатыгар үлэлии сылдьар дьон кыттыыны ыллылар. Хас биирдии тыл этээччи, дакылаат ааҕааччы ойууру сөргүтэр, саҥа мастары үүннэрэр наадалааҕын, уонна ирбэт тоҥҥо маһы түргэнник үүннэрии албастарын, бэйэлэрин көрүүлэрин этиннилэр.

Валерий Фёдоров, Арктикатааҕы агротехнологическай университет ректорын эбээһинэһин толорооччу: "Бастакы выпускниктарбыт ойуур хаһаайыстыбатыгар номнуо үлэлээн эрэллэр.  Университет ойууру чөлүгэр түһэриигэ күүскэ үлэлэһэр".

Бу маннык хабааннаах форум хас сылын ахсын ыытыллар. Ойуур хаһаайыстыбатын үлэһиттэрэ сыллата үлэлэрин түмүгүн кэпсиир, саҥа ситиһиилэрин үллэстэр түһүлгэлэрэ буолар. Итиэннэ научнай-чинчийэр эйгэ үлэһиттэрэ саҥа кинигэлэрин билиһиннэрэллэр.