Арктикатааҕы эпос уонна искусство киинин тутуута салҕанар

70

7 этэстээх, 33 тыһыынча кв.м. иэннээх, 1,5 тыһыынча олорон көрөр миэстэлээх сүүнэ улахан Арктикатааҕы эпос уонна искусство киинэ бытаан хаамыынан да буоллар дьэндэйэн эрэр. Хамсык кэмигэр тутуу тохтуу сылдьан баран ааспыт сылтан сөргүтүллүбүтэ. Тутууга эппиэттээх тэрилтэ суруналыыстары эбийиэккэ киллэрэн үлэ хаамыытын көрдөрдө. Бүгүҥҥү күҥҥэ сыбаайата оннун булан, акылаат оҥоһуллан, тутааччылар дьиэ монолитнай каркаһын бэлэмнииллэр. Каркас бэлэмэ 60%   куоһарбыт, 13,5 тыһыынчаттан тахса кубометр бетон кутуллан турар. Афанасий Корякин горнай-геологическай техникуму бүтэрбитэ. Ааспыт кыһынтан ахсынньы ыйтан бу эбийиэккэ геодезиһынан үлэлиир. Сүрүн эбээһинэһэ бырайыагынан тутуу барарын ситиһии, көнөтүк, кыҥаан биэрии буолар.  

 

Афанасий Корякин, инженер-геодезист: "Каркас 60% оҥоһулунна, быйыл кыһын уотун тардан номнуо саҕалыахпыт".

 

 Бөдөҥ тутуута 300-чэкэ кэриҥэ киһи үлэлиир, бэдэрээт тэрилтэлэрэ тус-туһунан эбээһинэстэри толороллор. Саха олохтоох ыччата эмиэ кыттар. Бу судаарстыбыннай-чааһынай бииргэ үлэлэһии бырайыага олоххо киирэн эрэр. Арктикатааҕы эпос киинин тутуу Олонхо Юнескоҕа киирбититтэн ыла көтөҕүллэн, бастаан ыра санаа курдук салгыҥҥа сылдьан баран, 2019 сыллаахтан тутааччыны быһааран үлэ саҕаламмыта.

 

Манна Саха сирин судаарыстыбыннай филармонията, Олонхо уонна Саха тыйаатырдара дьиэлэниэхтэрэ. Ону тэҥэ улахан тэрээһиннэргэ анаммыт саала, быыстапкалыыр, сиэр-туом ыытар саалалар, репетициялыыр сирдэр, тыаһы-ууһу суруйар устуудьуйа, кафелар уонна рестораннар баар буолаллара күүтүллэр. Баараҕай култуура  кластера ураты тэрилинэн таҥыллыаҕа. Сыана-трансформер хайа баҕарар үрдүккэ көһө сылдьыан сөп буолуоҕа. Онон бу кииҥҥэ классическай кэнсиэрдэртэн тыйаатыр туруорууларыгар тиийэ улахан тэрээһиннэр биир былаһааккаҕа ыытыллар кыахтаныахтара. 

 

Туйаара Пестрякова, Саха сирин филармониятын генеральнай дириэктэрэ: «Биһиги олус үөрэбит, саҥа кэнсиэртиир саала үлэҕэ киирдэҕинэ ирдэбилгэ эппиэттиир буолуохтаах. Оччоҕо өссө өрө көтөҕүллүүлээхтик үлэлээн, саҥа ситиһиилэри көрдөрүөхтэрэ».

 

Киин Сайсары күөл кытылыгар турар. Бырайыак былаанынан биэрэк  дьон сылдьарыгар анаан оҥоһуллуоҕа. Ону тэҥэ култуурунай киини  эргиччи, ол эбэтэр 15 тыһыынча кв. м. иэннээх сир бүтүүннүү дьон сынньанар сиригэр кубулуйуоҕа. Ол курдук күүлэйдиир сирдэр, массыына турар сирэ, ландшафтнай дизайн керүллүөҕэ. Баараҕай комплекс эһиил кыһын ахсынньы ыйга үлэҕэ киириэ диэн былаанныыллар.