Паром сырыыта саҕаланна

35

Саха сирин сүрүн өрүстэринэн бү өрөбүл күннэртэн саҕалаан паромнар сырыылара саҕаланна. Дьокуускай-Аллараа Бэстээх хайысханан билигин 8 паром үлэлиир, сыыйа манна паром ахсаана эбиллэрэ күүтүллэр. Быйыл, чуолаан кыра ыйааһыннаах массыыналары туоратыыга, тарыып үрдээтэ. Сүрүн төрүөт - суоттааһыҥҥа уларыйыылар киириилэрэ.

Халлаан сылыйан, эбэбит мууһа ыраастанан паром сырыыта саҕаланна. Ааспыт нэдиэлэ бүтүүтүттэн өрүһүнэн айан сырыыта олохтонно,ону кытта хаайтарыы кэмэ бүттэ. Өрүс суола аһыллан дьон уонна паром үлэһиттэрин сүргэлэрэ көтөҕүллэн сылдьар. Даркылаахха сарсыарда эрдэттэн тимир көлөлөөх дьон мустан, болдьоммут кэми тутуһан айанныыр. Онон күнүһүн улахан уочарат суох.

СК-2014 паром бараары бэлэмнэнэр,  хоҥноро олох аҕыйах мүнүүтэ хаалла. Бүтэһик массыыналар баттаһа кэлэн киирэллэр. Бэнидиэнньик күнтэн Дьокуускай - Аллараа Бэстээх хайысханан паромнар сылдьар бириэмэлэрэ бигэргэннэ. Сарсыарда 5 чаастан саҕалаан түүн 12 чааска диэри айанныахтара. Холобура, Дьокуускайтан бастакы паромнар  сарсыарда 5:30, 6:30, 7:30 хоҥнуохтара, оттон Аллараа Бэстээхтэн 5,6,7 чаастартан устуохтара. Онтон хамсааһын арыта ортотунан 40 мүнүүтэттэн 1 чааска диэри халбаҥныан сөп.  

Станислав Евтикеев, "СК-2014" теплоход капитана: "Билигин 8 паром үлэлиир. Онтон бу сотору кэминэн тохсус паром эбиллиэ. Күн бүгүн барыта этэҥҥэ, бытаарыы суох".

Этиллибитин курдук Дьокуускай - Аллараа Бэстээх хайысханан билигин күннэтэ 8 паром тырааныспары, дьону таһар. Сотору кэминэн паромнар ахсааннара бу хайысханан эбиллиэҕэ.

Дьокуускай - Аллараа Бэстээх хайысханан барыта 15 паром сылдьыаҕа, онтон Кангаласс – Суотту туһаайыытынан 2 аал таһыаҕа итиэннэ Хачыкаат – Мохсоҕоллоох хайысханан 4 паром бу сайын сылдьыаҕа.

Быйыл айан төлөбүрүгэр үрдээһин баар. Кыра ыйааһыннаах массыыналары тиэйиигэ тарыып ыйааһыннарыттан көрөн 150-200 солкуобайынан эбилиннэ. Сыана кэмитиэтэ быһааран этэринэн, бу сылтан ыла тырааныспар ыйааһыныттан буолбакка, палубаҕа ылар иэнин миэстэтиттэн төлөбүрү ааҕыыга көһүү саҕаланна. 

Алла Булгытова, СӨ сыана кэмитиэтин тырааныспар уонна уматык салаатын салайааччы: "Эрдэ массыына ыйааһынынан сыана быһыллар буоллаҕына, быйылгаттан кыралаан төһө иэннээх сири ыларынан көрөн төлөбүрү быһыыны киллэрдибит. Ол иһин кыра массыыналарга уларыйыы араастаан таҕыста. Холобур, кыра массыына былырыын 500 солкуобай эбит буоллаҕына быйыл 650 солкуобай буолла. Онтон 2 туонналаахтар 950 солкуобайы төлүөхтэрэ".

Оттон 2 уонна 3 туонналаах массыыналар төлөбүрдэрэ 1100 солкуобайга тэҥнэстэ. Бэлиэтээн эттэххэ, үрдээһин таһаҕас тиэйэр улахан тырааныспардары таарыйбата. Кинилэр ааспыт сыллааҕы тарыыбынан айанныахтара