Бэрдьигэстээххэ саха оҕунан ытыыга күрэх буолла

Кэлиҥҥи сылларга Горнай улууһун Бэрдьигэстээх нэһилиэгэр түөлбэнэн хамсааһын күүһүрбүтэ бэлиэтэнэр. Олохтоохтор олорор түөлбэлэрин тупсарыыга, хомуйууга күргүөмүнэн тахсан үлэни үмүрүтэллэр. Ону таһынан култуурунай, спортивнай күрэхтэһиилэргэ эмиэ ким да туора турбат. Ааспыт өрөбүллэргэ түөлбэлэр ортолоругар төрүт оҕунан ытыыга бөдөҥ күрэхтэһии буолла.

Бэрдьигэстээх түөлбэлэрин ортотугар саха төрүт оҕунан ытыыга бастакы улахан күрэхтэһии буолла. Өссө бу саас эрдэттэн түөлбэлэр олохтоохторо күрэхтэһиигэ  анаан бэлэмнэнэн саҕалаабыттара. Балаһыанньа быһыытынан кыттааччылар инники өттүгэр бу көрүҥүнэн дьарыктамматах, бу көрүҥҥэ ситиһиилэммэтэх буолуохтаахтара ирдэннэ. Күн аҥарыттан ордук барбыт тэрээһиҥҥэ уопсайа 10 түөлбэ хамаанда туруорбутуттан 7 хамаанда  6 киһилээх  толору састаабынан уонна 3 хамаанда быһаҕас састаабынан зачету таһынан кииристилэр.

Дмитрий Агеев, саха оҕунан ытыыга күрэх судьуйата: "Күрэххэ үс көлүөнэ кытынна. Ол курдук 50 саастарыгар диэри, онтон 50 – 60 саастаахтарга уонна 60 саастан үөһэлэргэ диэн арахсан төрүт оҕунан ытыыга күрэхтэстибит. Бэрдьигэстээххэ уопсайа 12 түөлбэ баарыттан 10 кыттыыны ылла. "

Охчуттар кус, куобах уонна тииҥ ойуутун 15 миэтэрэттэн туран  биэстии эргииринэн ытыалаатылар.  Ол курдук куобахха 1, куска 2, тииҥҥэ 3 очукуо ааҕылынна. Кыттааччылар сахалыы таҥастаах туран киирсибиттэрэ күрэҕи киэргэттэ. "Сардаҥа" түөлбэ хамаандатыттан кыттыыны ылбыт  Нина Павлова: "Маннык күрэхтэһии ыытыллара олус үчүгэй. Мин бэйэм баҕа өттүбүнэн кытынным. Эрдэ хаһан да оҕунан дьарыктана сылдьыбатаҕым. Бэйэм кыахпын тургунан көрөөрү күрэххэ кэллим", - диэн санаатын үллэһиннэ.

Хамаанданан уопсай түмүккэ 84 очукуолаах  "Үрдэл" түөлбэ үһүс, 92 очукуолаах "Эйэ" түөлбэ иккис уонна 110 очукуолаах "Эбэ" түөлбэ маҥнайгы миэстэҕэ тиксэн  кыайыы көтөллөннүлэр. "Эбэлэр" бу күрэхтэһиигэ  анаан барыны бары быраҕан туран киэһэ ахсын дьарыктаммыттара. Ол да иһин барыларын көрдөрүүтэ үрдүк буолла. Тэрээһиҥҥэ  урбаанньыт Анатолий Люфа уонна "Талакаан" хампаанньа салайааччыта Василий Николаев бириистэри үбүлээтилэр.

Вера Константинова, "Эбэ" түөлбэ хамаандата: "Биһиги түөлбэнэн  туохха барытыгар кыттыһа сатыыбыт. Салайааччыбыт Вероника Сергеева бырыбытын түмэр. Онон эдэрдиин эмэнниин биир да субуотунньугу, хайа баҕар тэрээһини көтүппэккэ кыттабыт".

Түмүккэ 9 охчут  биирдиилээн муҥутуур кыайыы иһин кииристилэр. Манна эр дьону  куоһаран "Дьоллоох" түөлбэттэн Евгения Степанова кыайыылаах таҕыста.

Евгения Степанова, биирдиилээн күрэхтэһиигэ муҥутуур кыайыылаах: "Хамаанданан аҕыйах очукуонан кыайтаран кыһыылаахтык 4 миэстэ буоллубут. Ол оннугар мин муҥутуур кыайыы иһин күрэххэ бастаатым. Онтон олус диэн соһуйдум уонна үөрдүм".

Кэлиҥҥи сылларга нэһилиэк дьаһалтата түөлбэ хамсааһыныгар болҕомто уурбутун түмүгэр,  дьон сэргэ барыга бары, үлэҕэ-хамнаска, араас култуурунай тэрээһиннэргэ,  спортивнай да күрэхтэһиилэргэ көхтөөх буолла. Хас биирдии түөлбэ олохтооҕо   сэлиэнньэ, улуус  түөлбэттэн саҕаланарын үгүстэрэ табатык өйдөөннөр үүнүүгэ сайдыыга хас биирдии киһи кылаатын киллэрсэргэ дьулуһар. Маныаха кыах бэрилиннэ.