Саха сиригэр ууга-уокка буспут, үлүйбүт дьону эмтиир сулууспа 30 сыла

Быйыл Саха сиригэр ууга-уокка буспут, үлүйбүт дьону эмтиир комбустиологическай сулууспа тэриллибитэ 30 сыла. Билигин ожоговай киин Өрөспүүбүлүкэтээҕи 2-с нүөмэрдээх балыыһа иһинэн үлэлиир. Үбүлүөйдээх сылларын көрсө научнай-практическэй конференцияны тэрийдилэр.

Ожоговай киин быраастара күннэтэ араас таһымнаах эчэйиилэри эмтииллэр. Манна өрөспүүбүлүкэ бары кэриэтэ улуустарыттан кэлэн эмтэниини ааһалар. Суһал түгэннэргэ сан авиацианнан ыарыһахтарын таһаллар. Сылга 100 тахса рейс оҥоһуллар. Онон сыллата кииҥҥэ 800 тахса итиигэ буспут, үлүйбүт дьон эмтэнэр.

"Биһиэхэ Сахабыт сирин туох баар муннугуттан эчэйбит дьон кэлэн эмтэнэллэр. Суһал көмөнү оҥоробут, былааннаммыт эмтэнии эмиэ баар. Ол аата эчэйбит киһи кэлин остоҕуна баас онно хаалар. Ону эмтиибит, эпэрээссийэ оҥоробут", - диир Өрөспүүбүлүкэтээҕи 2-с №-дээх балыыһа Ожоговай киинин хирург-бырааһа Мария Большакова.

Өрөспүүбүлүкэтээҕи 2 нүөмэрдээх балыыһа - суһал медицинэ көмөтүн киинин уоттан, тымныыттан эчэйбиттэри эмтиир салаата быйыл 30 сылын бэлиэтиир. Аан бастаан 1993 сыллаахха термическэй салаа быһыытынан арыллан, Сахабыт сиригэр медицина комбустиологическэй сулууспата тэриллэр. Күннэтэ тустаах медицинэ киинигэр хас да эпирээссийэни оҥороллор. Кэнники сылларга материальнай техническэй бааза сайдан, уустук эппэрээссийэлэри оҥорор буоллулар. 40 сыл устата медицина эйгэтигэр үлэлээбит Семен Алексеев 37 сыл устата ууга буспут, үлүйбүт дьону эмтээн кэллэ. Билигин ординатордары үөрэтэн, саҥа кэлбит быраастарга сүбэ-ама буолар.

“Бу салаа кэнники 2002 сыллааха Өрөспүүбүлүкэтээҕи балыаһаҕа кэлбитэ. Ол кэлэммит өссө сайдыы баран, оҕолору көрөр туспа куойка уонна реанимационнай салаа арыллыбыта. Уонна миэстэбит 50 куойкаҕа диэри улааппыта”, - диэн  Өрөспүүбүлүкэтээҕи 2-с №-дээх балыыһа Ожоговай киинин ординатор-бырааһа Семён Алексеев кэпсиир.

Регионнар икки ардыларынааҕы 19 конференцияҕа ууга-уокка сиэтии, эти-хааны тоҥоруу, үлүйүүнү эмтээһин ньымаларын тула кэпсэттилэр. Сахабыт сирэ ураты климатическэй сиргэ турар буолан, бу ыарыыны эмтээһиҥҥэ өрөспүүбүлүкэ быраастара дириҥ, баай уопуттаахтар. Быйыл термическэй оһоллору эмтээһиҥҥэ Саха сирин быраастара бүтүн Арассыыйа үрдүнэн 10 бастыҥ иһигэр киирдилэр.

“Биһиги дойдубутугар кыһын тымныы буолан, үгүс дьон үлүйэр. Ону таһынан, кыһыммыт уһун буолан оһох оттуу, бэйэ илиитинэн оҥоһуллубут оһохтору туттуу элбэх. Ол иһин баһаарбыт эмиэ элбэх. Уокка буһуу үксүн ырахан истиэпэннээх буолар. Олус ыарахан үлэлээх киин”, - диэн Өрөспүүбүлүкэтээҕи 2-с №-дээх балыыһа травматологическай киинин салайааччыта Анатолий Горохов иһитиннэрдэ.

Сыллата Саха сиригэр 500 кэриҥэ киһи ууга-уокка буһар, 200 тахса киһи үлүйэр уонна 100 кэриҥэ киһи араас эчэйиини ылар. Конференцияҕа Арассыыйа үгүс регионнарыттан араас таһымнаах быраастар, учуонайдар кэлэн кыттыыны ыллылар. Сүрүн болҕомто оҕолорго ууруллар, ол курдук бүтүн Өрөспүүбүлүкэ үрдүнэн сылга 350 курдук оҕо итиигэ буһуута, үлүйүүтэ бэлиэтэнэр. Онон конференция - уопут атастаһыынан, саҥа ньымалары олоххо киллэриинэн, чөлүгэр түһэрии үлэтин тупсарарга оҥкул буолуоҕа.