Чэгиэн турук - үйэни уһатар

48

Сибиэһэй салгыҥҥа эти-хааны  уһугуннарар сарсыардааҥҥы дьарык  доруобуйаҕа туһалаах. Киин куорат болуоссаттарыгар, пааркаларыгар  чөл олоҕу тутуһааччылар чэбдигирдэр дьарыкка түмсэллэр. Хотугу хаалыктаах хаамыы "Сардаҥа" бөлөҕө быйыл тэриллибитэ 8 сыл буолла.

Сарсыардааҥҥы  чэбдигирдэр дьарык  эти-хааны уһугуннарыыттан саҕаланар. Сардаҥа бөлөх  кыттыылаахтара күн бастакы сардаҥатын кытары тэҥҥэ уһуктан, сибиэһэй салгыҥҥа Кыайыы пааркатыгар кэлэн дьарыктаналлар. Бөлөххө 40 кэриҥэ киһи сылдьар, манна 70-80 саастарыттан лаппа тахсыбыттар кытта бааллар. 

"Сарсыарда 5 аҥаар чаастан кэлэн, көрсөн олус үөрэбит-көтөбүт, сонуммутун кэпсэтэтбит. 6 чаас буолла да, сарсыардааҥҥы дьарыкпытыгар киирэбит. Төбөбүтүттэн, илиибититтэн саҕалаан, атахпытыгар диэри  имитэ түһэн баран, хаама барабыт. 20-30 мүнүүтэ курдук хаамабыт, ол кэнниттэн иҥиирдэрбитин ууннарабыт”, - диир "Сардаҥа" хотугу хаалыктаах хаамыы бөлөҕүн инструктора  Айталина Рожина.

Варвара Дьяконова  бөлөххө бастаан кэлэригэр нэһиилэ хаамар эбит. Хаамыынан дьарыктаныаҕыттан, сыл аҥарын иһигэр, доруобуйата биллэ көммүтүн бэлиэтээбит. Билигин тэтиэнэхпин диэн үөрэ кэпсиир.  Кини хаалыктаах хаамыы дьарыгын булбутуттан олус үөрэр.

"Наадалаахпын булан истибитим, бронхиккытын, атаххыт, тобуккут ыарыытын умна5ыт диэбитэ. Ону мин кыһалҕабын чопчу эппиттэрин истэн күлбүтүм уонна сөхпүтүм. Кыһын буолан манежка саҕалаабытым. Биирдэ өйдөөн көрбүтүм, үчүгэйдик утуйар буолбуппун. Дьиктиргээтим, соһуйдум. Онтон бэлиэтээн көрбүтүм, кырдьык, тобугум ыарыыта ааспыт", - диэн "Сардаҥа" хотугу хаалыктаах хаамыы бөлөҕүн кыттыылааҕа Варвара Дьяконова кэпсиир.

Оттон Любовь Саввична 4 сыллааҕыта Бүлүү Тылгынытыттан көһөн кэлбит. Кини дойдутугар хаамар дьарыгы саҕалаабыт. Бастаан аналлаах хаалык суох буолан, тэтин мастан оҥостон туталлар эбит. Куоракка кэлэн дьон дьарыктанарын көрөн, бөлөх дьарыгар кыттыһан барбыт.

Хамсаныы, олоххо көхтөөх буолуу  чөл турук мэктиэтэ. Ордук сааһырбыт дьоҥҥо күнү сэрээккэттэн саҕалыыр туохтааҕар да туһалаах. Бөлөх кыттыылаахтара  биир дьиэ кэргэн курдук умсугуйан туран дьарыктарын көтүппэккэ сылдьаллар.

"8 сыл устата, күн ахсын, күһүннэри, сайыннары, кыһыннары хаамтым. Ол курдук өрөөбөккөбүн хааман, олус үчүгэй турукка сылдьабын. Сүбэлиэм этэ,  сааска баттаппакка эрэ хамсана сылдьыахха наада", - диэн "Сардаҥа" хотугу хаалыктаах хаамыы бөлөҕүн кыттыылааҕа Валентина Толстякова үллэһиннэ.

Тыҥаны сайыннарар тыыныыны, дорҕоону  дьүөрэлээн  биир тэтимҥэ киирэллэр. Ким төһө уһун тыыннааҕынан дорҕоон таһаараллар.

Маннык олоххо көхтөөх дьон, доруобуйа туһугар бииргэ түмсэн чөл олоҕу  тутуһууга көҕүлээччи буолаллар