"Безопасная Арктика" чинчийии үөрэҕин түмүгэ таҕыста

Саха сиригэр "Безопасная Арктика" диэн биэдэмстибэлэр икки ардыларынааҕы уопут, чинчийии үөрэҕин түмүгүн таһаардылар. Хас даҕаны өрүттээх үөрэх кэмигэр 2 бөдөҥ экспедиция тэрилиннэ, туохтан да иҥнибэт тиэхиникэлэр туруктарын тургутан көрдүлэр, маны таһынан Уһук Илин уонна Сибиир спортсменнарын ортолоругар спорт национальнай көрүҥнэригэр күрэхтэһиилэри ыыттылар. Климаты үөрэтиигэ биир кэлим диспетчерскэй сулууспаны кытта үлэлэстилэр. Тэрээһиннэр арктика суонатыгар киирэр Өрөспүүбүлүкэ 13 улууһугар буоллулар.

"Биһиги Өрөспүүбүлүкэбит манна арктика үгүс территориятын ылан олорор регион быһыытынан кытынна. Икки улахан экспедиция буолбута. Ол курдук, 2500 килэмиэтирдээх сиргэ, Орто Халыма куоратыгар уонна 1252 килэмиэтирдээх Баатаҕай куоратыгар тиийэ. Маны тэҥэ, тустаах тэрээһиҥҥэ 22 тыһыынча киһи кытынна диэн бэлиэтиибит. "Безопасная Арктика" иитинэн хайдах сэрэхтээх буолууга, айылҕаны харыстааһыҥҥа, хайдах олоробутугар дьүүллээһиилэр, аһаҕас кэпсэтиилэр уонна саҥа техниканы көрдөрөр быыстапкалар буолбуттара", - диэн СӨ бырабыыталыстыбатын бэрэссэдээтэлин бастакы солбуйааччы Дмитрий Садовников иһитиннэрдэ.