Сиртэн хостонор баайы, күндү таастары көрдөрөр саҥа түмэл арылынна

Максим Кирович Аммосов аатынан ХИФУ геологическай чинчийии факультетыгар саҥа түмэл арылынна. Манна сиртэн хостонор баай, күндү таастар көрдөрүүгэ турдулар. Түмэли устудьуоннар эрэ буолбакка, олохтоохтор, ким баҕалаах тиийэн көрүөн сөп.

Саҥа геология түмэлигэр күндү таастар, алмаас, кристалл, минерал уонна да атын сиртэн хостонор баай хайысхаларынан арахсан сиһилии көрдөрүүгэ турда. Саҥа түмэлгэ барыта 2 тыһыынча экспозиция киирэр.

Факультет аҕа уһуйааччыта Евдокия Дмитриевна геология эйгэтигэр үлэлээбитэ 50 сыл буолла. Бу эйгэҕэ олоҕун барытын анаабыт киһи буолар. Саха сиригэр хостонор баайы барытын билэр. Түмэлгэ баар экспозициялары биһиги устар бөлөхпүтүгэр  кэпсээтэ.

"Уопсайынан мунньуллубут таастар, минераллар 3 тыһыынча курдуктар. Онтон быыстапкаҕа 2 тыһыынча турар, саамай үчүгэйдэри туруордубут. Олус интириэһинэй, киэн туттар тааспыт чароит. Учуонайдар чароитка 30 минералы булан тураллар", - диир М.К. Аммосов аатынан ХИФУ сири чинчийии факультетын прикладной геология кафедратын аҕа уһуйааччыта Евдокия Акимова.

Геолого-разведечнай факультетка күн бүгүн 500 кэриҥэ устудьуон 4 хайысханан үөрэнэр. Бүлүү улууһуттан сылдьар Александр Гаврильев геолог үөрэҕэр анаан- минээн киирбит. Кини сиргэ хамсыыр ууну, сир ириитин туһунан чинчийэн үөрэтэр. 

"Бу билигин петрография диэн предмет буола турар. Шлифтарга хайа боруодатын быһан киллэрэллэр, ону биһиги микроскобунан көрдөхпүтүнэ туох баар минераллары көрөбүт. Кинилэр быраһыаннарын, хайдах үөскүүллэрин үөрэтэбит", - диэн  ХИФУ ГРФ 4 кууруһун устудьуона Александр Гаврильев сырдатта.

Устудьуоннар куруутун бөдөҥ промышленнай тэрилтэлэргэ практикаларын   ааһаллар. Бу уустук идэни уолаттар эрэ буолбакка, кэрэ аҥардар эмиэ талаллар. Орто Халыматтан сылдьар Раиса Третьякова сиртэн хостонор баайы булуу салаатыгар үөрэнэр. Үөрэҕим олус интэриэһинэй, практикаҕа сылдьарбын туохтааҕар да ордоробун, онно сылдьан элбэҕи билэбин, саҥаны арыйабын диэн этэр.

"Оскуола кэмиттэн баҕаран туран киирбитим. Таласпытым уонна ситиспитим. Иккис куурсу бүтэрэн баран ХИФУ полигонугар барбыппыт. Томпотооҕу полигон диэн ааттаах. Декаммыт, преподователлэрбит салайан илдьэ сылдьыбыттара. Биһиги идэбитигэр бастакы хардыы оҥорбуттара, көрдөрбүттэрэ. Тугу гынарбытын, хайдах үлэлиэхтээхпитин, тугу ааһарбытын", - диэн ХИФУ ГРФ 3 кууруһун устудьуона Раиса Третьякова иһитиннэрдэ.

Саҥа арыллыбыт геология түмэлэ устудьуоннар билиилэрин өссө хаҥаталларыгар төһүү күүс буолуо диэн үөрэх салаата эрэнэр. Оттон олохтоохтор Саха Сирин баайын көрдөрөр түмэлгэ күһүҥҥүттэн сылдьыахтарын сөп.