Саха сиригэр оҕо лааҕырдарыгар бастакы сезоҥҥа бэлэмнэнии саҕаланна

Сотору кэминэн үөрэх дьыла түмүктэнэн, оҕолор сайыҥҥы сынньалаҥнарыгар тарҕаһыахтара. Быйыл ыам ыйын саҥатыттан оҕо лааҕырдарыгар суруттарыы Госуслуги потал нөҥүө тэриллэн ыытыллар. Өрөспүүбүлүкэ үрдүнэн уопсайа 500 тахса, ол иһигэр Дьокуускайга 51 лааҕыр оҕо сынньалаҥын тэрийиэҕэ. Бастакы сезоҥҥа бэлэмнэнии номнуо саҕаланна.

Дьокуускайдааҕы 2 нүөмэрдээх орто оскуола "Спутник" диэн лааҕыра куорат бөдөҥ лааҕырдарыттан биирдэстэрэ буолар. Манна сыллата ... оҕо сайыҥҥы сынньалаҥын туһалаахтык атаарар. Сотору кэминэн лааҕыр аанын тэлэччи аһыаҕа, онон бэлэмнэнии үлэтэ күргүөмнэхтик саҕаланна. Оскуола улахан кылааһын үөрэнээччилэрэ учууталларын кытта лааҕыр территориятын хомуйаллар, бөхтөн-сыыстан ыраастыыллар.

"Оскуолабыт лааҕырын хомуйа сылдьабыт. Оҕолор кэлиэхтээхтэр. Бүгүн бу сиргэ түспүт сэбирдэхтэри хомуйабыт. Аныгыскы күннэргэ эмиэ кэлиэхтээхпит", - диир Дьокуускайдааҕы 2№-дээх орто оскуола үөрнээччитэ  Ира Сыроватская.

Сарсыардаттан оҕолор кыраабыл, куул тутуурдаах түбүгүрэллэр. Кыргыттардыын, уолаттардыын бары иллээхтик сибиэһэй салгыҥҥа сылдьан үлэлииллэр-хамсыыллар. 

"Лааҕырбыт территориятын хомуйа сылдьабыт. Былырыын хаалбыт оту-маһы оҕолор олус үчүгэйдик хомуйа сылдьаллар. Бүгүн 3 чаас үлэлиибит, онтон эбиэттэн киэһээ атын оҕолор кэлэллэр. Онтон сотору оҕолор олорор куорпустарын сууйа кэлиэхтээхпит", - диэн Дьокуускайдааҕы 2№-дээх орто оскуола учуутала Мария Охлопкова кэпсээтэ.

Киин куоракка сайыҥҥы оҕо лааҕырдарыгар алта аҥарыттан 17 диэри саастаах Дьокуускайга олорор оҕолор сылдьар кыахтаахтар. Быйыл сайын куорат үрдүнэн  51 муниципальнай лааҕыр аанын тэлэччи аһыаҕа. Бэлиэтээн эттэххэ, ааспыт сылга Дьокуускайга 45 оҕо лааҕыра үлэлээбитэ, онон бу сырыыга 6 лааҕыр эбиллэн биэрдэ. Бэс ыйын саҥатытан лааҕырдар үлэлэрин саҕалыахтара. Онон бу нэдиэлэ саҥатыттанан тустаах хамыыһыйа оскуола иһинэн тэриллэр лааҕырдары бэрэбиэркэлии сылдьар.

"Роспотребнадзор балаһыанньатынан сааскыттан үлэ барар. Сантиранай-эпидимиологическэй ирдэбиллэри тутуһар бэрээдэктэри көрөллөр. Ол курдук  арыллар күнүскү уонна куорат таһынааҕы лааҕырдар олунньу ыйтан саҕалаан сайаапкаларын биэрбиттэрэ. Ол түмүгүнэн, билигин 40 күнүскү үлэлиэхтээх лааҕыр Роспотребнадзор сертификатын ылла", - диэн Дьокуускай куорат үөрэҕириигэ салалтатын начальнигын солбуйааччы Егор Охлопков иһитиннэрдэ.

Дьокускайдааҕы 2 нүөмэрдэх оскуола улахан кылаастарын үөрэнээччилэрэ сайыҥҥы сынньалаҥнарын бары өтүнэн көдьүүстээхтик атаарар соруктаахтар.

Оҕо сынньалаҥын тэрийии сыллата тустаах болҕомтону ылар. Быйыл Саха сирин үрдүнэн сүүстэн тахса тыһыынча оҕо сынньалаҥын туһалаахтык атаарыа турдаҕа. Лааҕырдар үлэлэрэ бэс ыйын саҥатыттан саҕаланан, сменэлэринэн ыытыллыаҕа.